Recent Posts

Breaking News

Kawani sa Lapu City Hall gipatay


WALA pay matumbok nga motibo ug suspek ang kapulisan sa pagpamusil sa usa ka kawani sa Lapu-Lapu City Hall niadtong Lunes, Hunyo 1.

Ang insidente nahitabo sa Sitio Colis, Brgy. Bankal, dakbayan sa Lapu-Lapu.

Giila ang biktima nga si Ryan Fuentes Daño, 34, taga Barangay Agus, job order employee sa Lapu-Lapu City Hall sa City Engineering Office.

Matod ni Police Captain Albert Jay Samson, hepe sa Police Station 5, nga si Daño nag-ayo og kuryente sa dapit nga nahitabo-an sa dihang adunay niabot nga duha ka tawong luwan sa motorsiklo.

Kalit lang gipusil si Daño sa makadaghang higayon.

Dali nga misibat ang mga mamumuno.

Sigun pa sa mga kauban ni Daño, kalit ang hitabo ug wala na sila makabantay sa plate number sa motorsiklong giluwanan sa gunman. Nakataptap usab ang mga mamumuno sumala pa ni Samson hinungdan nga lisud ang pag-ila.

Giingong nakadagan pa si Daño sa usa ka panimalay aron magpakitabang ug didto na kini makabsi sa iyang kinabuhi. (GCM)


Source: Sun.Star Superbalita (https://www.sunstar.com.ph/article/1858729/Superbalita-Cebu/Balita/Kawani-sa-Lapu-City-Hall-gipatay?ref=rss&format=simple&link=link)

No comments