Recent Posts

Breaking News

Kapitolyo gi-disinfect; trabaho gisuspenso


SUGOD karong adlawa, Hulyo 1 ngadto sa Hulyo 5, suspendido ang trabaho sa Kapitolyo gumikan sa pag-disinfect sa edipisyo.

Miluwat og memorandum si Cebu Governor Gwendolyn Garcia alang sa pagpahigayon sa disinfection.

Karong adlawa ngadto na sa Hulyo 3, unahon sa pag-disinfect ang receiving area, conference room, provincial administration ug HR, social hall, Budget ug Treasurer's Office, barangay affairs, legal office ug agriculture office.

Samtang sa hapon, isunod ang mga buhatan sa Provincial and Planning Development Office, Tourism Office, chapel, ICTO, Records Section ug Provincial Engineering’s Office.

Sa Huwebes, Hulyo 2, i-disinfect sab ang Provincial Health Office, BAC, Accounting ug Pre-Audit, Public Employment Service Office (PESO), Provincial General Services Office (PGSO), Provincial Environment and Natural Resources Office (PENRO), (Provincial Social Welfare and Development Office (PSWDO), Veterinary office, Provincial Assessor, medical clinic, maintenance, ang tanang pansayan ug hallway.

Ilakip usab ang tibuok Legislative building.

Samtang sa Biyernes, Hulyo 3 ,ipahigayon ang pag disinfect sa Provincial Disaster Risk Reduction Management Office (PDRRMO), Public Information Office (PIO), PGSO warehouse, PEO Soil Laboratory, Provincial Veterinary Laboratory, Provincial Health Laboratory.

Sa hapon, isunod ang PEO Motorpool, PGSO main warehouse, depot ug palibot.

Ang pag disinfect pangulohan sa PDRRMO), Provincial Health Office (PHO) ug Capitol Civil Security Division.

Kini gihimo aron kalikayan ang pagkuyanap sa virus sa tibuok edipisyonsa Kapitolyo.

Gikatakda nga sa Hulyo 6, 2020 mahimo na nga makabalik sa trabaho ang mga empleyado sa Kapitolyo.

Duha na ka mga empleyado sa Kapitolyo ang nangamatay, usa kompirmadong tungod sa coronavirus disease (Covid-19) samtang ang usa gituohang samang sakit gihapon bisan negatibo sa confirmatory test.

Base sa uwahing datos aduna nay 15 na nga nalista ang Provincial Health Office nga nag positibo sa Covid-19, hinuon duha na ka mga tawo ang nangaayo. (ANV)


Source: Sun.Star Superbalita (https://www.sunstar.com.ph/article/1862006/Superbalita-Cebu/Balita/Kapitolyo-gi-disinfect-trabaho-gisuspenso?ref=rss&format=simple&link=link)

No comments