Recent Posts

Breaking News

Inilang fashion designer sa Sugbo nipanaw


NAPALGANG patay ang inilang fashion designer sa Sugbo nga si Lord Maturan sulod sa iyang apartment unit sa Barangay Day-as sa Dakbayan sa Sugbo Huwebes sa buntag, Hunyo 25, 2020.

Matod sa usa sa mga silingan ni Maturan sa maong apartment building nga nahinabi sa Superbalita Cebu, napalgan nga walay kinabuhi si Maturan ug gituohang cardiac arrest ang hinungdan.

Gitago sa Superbalita Cebu ang ngalan sa informant alang sa privacy niini.

Sa dugang taho nga nakuha sa Superbalita Cebu, nasayran nga nanawag pa si Maturan sa iyang igsuon gabii, Hunyo 24, tungod kay naglisud og ginhawa.

Aduna sab mga health personnel, pulis, ug taga barangay nga niadto sa maong apartment building diin gikuhaan og swab test si Maturan kinsa gihulagway nga walay sintomas sa coronavirus disease.

Naabot usab ang amahan ug igsuon ni Maturan sa iyang aparment unit kaganihang buntag.

Nanggawas sa social media ang mga mensahe sa pahasubo gikan sa mga higala ug supporters ni Maturan.

Sa Facebook post ni Cebu Ports Authority Commissioner Mike Acebedo Lopez, gihulagway niini nga "heartbreaking" ang pagpanaw ni Maturan.

Classmate ug suod nga higala ni Lopez ang inilang fashion designer.

"Lord! And we were going to feature you on London Fashion Week. And we were all so excited. This is so devastating. Life is fleeting, indeed. Love you, dear friend. Farewell," asoy ni Acebedo sa laing Facebook post niini.

Nisuway og kontak ang Superbalita Cebu sa assistant ni Maturan aron makuhaan og dugang detalye kalabot sa maong insidente, apang wala makasulod sa linya ang tigsuwat ning balita.

Nagsugod sa streetwear ug rock n' roll-inspired nga mga disenyo si Maturan hangtod nisikat tungod sa pangkasal nga trabaho niini.

Nakadaog sab si Maturan sa Cebu Young Designers Competition niadtong 2007 ug nahimo kining mentor sa Fashion Institute Design and Arts Cebu. (NDT)


Source: Sun.Star Superbalita (https://www.sunstar.com.ph/article/1861359/Superbalita-Cebu/Balita/Inilang-fashion-designer-sa-Sugbo-nipanaw?ref=rss&format=simple&link=link)

No comments