Recent Posts

Breaking News

Hubog gitigbas, gidunggab


DAVAO DEL SUR -- Usa ka kasong pagpanigbas ug usa ka pagpanunggab ang nahitabo sa managlahing lugar sa probinsya human pulos lango sa ilimnong makahubog ang mga biktima ug mga suspek adlaw'ng Lunes.

Sa tahong nahidangat sa Davao del Sur Provincial Police Office (DSPPO), gikataho nga natigbasan ang laborer nga si Jessie Maldan, hamtong ang pangedaron, molupyo sa Purok 7, Barangay Leling, Hagonoy, Davao del Sur.

Gitudlong suspek ang silingan niini nga si Rodrigo Canoy Panoril, 32.

Sa inisyal nga imbestigasyon sa kapolisan, gihulagway nga ang biktima maoy miadto sa balay sa suspek, kinsa pulos lango sa ilimnong makahubog ug nahitabo ang ilang init nga panaglalis tungod sa personal nga bikil.

Human sa pipila ka minuto, natigbasan na sa suspek ang biktima gamit ang sundang mao nga dali kining gidala sa Medical Center of Digos Cooperative (MCDC).

Sa siyudad sa Digos, nadunggaban ang biktimang si Emy Talay Cabales, 42, minyo nga residente sa Barangay Binaton, alas 6:30 sa gabii sa maong adlaw.

Ang suspek nailhan nga si Rain Diaz, alyas Rentoy, silingan sa biktima.

Sa imbestigasyon sa kapolisan, nasayran nga unang nagtagay sa ilimnong makahubog ang suspek ug biktima didto sa balay sa ilang silingan nga si Marcelo Ruiz.

Apan, misangko sa wa pagsinabtanay ug nahitabo na ang panaglalis ug human niini mipauli ang suspek sa ilang balay ug mibalik nga nagbitbit na og kutsilyo.

Gihuwat ra diay sa suspek nga mopauli ang biktima nga iyang gi-atngan ug didto na gihimo ang pagpangluba sa makadaghang higayon.

Hinuon, natabang pa ang suspek dihang nadala dayon sa usa ka tambalanan sa dakbayan.

Sa kasamtangan, gipangita na sa kapolisan ang suspek human paspas nakasibat sa salaod nga nahimo. (Orlando B. Dinoy)


Source: Sun.Star Superbalita (https://www.sunstar.com.ph/article/1859515/Superbalita-Davao/Balita/Hubog-gitigbas-gidunggab?ref=rss&format=simple&link=link)

No comments