Recent Posts

Breaking News

Ginang, 67, gipusil patay; bangi sa yuta ‘motibo’


USA ka biyuda nga unang gituohang gibugno sa anay nga baboy, gipusil patay diay niadtong Martes, Hunyo 23, 2020 sa mga alas 6 sa buntag sa Sitio Danasan 2, Barangay Danasan, Dakbayan sa Danao.

Si Enorencia Castro, 67, mag-uuma, napalgan nga patay sulod sa alad sa baboy ug gikaon ang pipila ka mga kuyamoy hinungdan nga unang gituohan nga gipatay sa baboy.

Nakaplagan siyang patay na sa iyang silingan, kabanay ug kapulisan samtang naglunang sa kaugalingong dugo.

Si Police Corporal Raymund Ermita, imbestigador sa Danao Police Station nga nahinabi sa Superbalita Cebu, niingon nga alas 12:05 na sa udto niadrong Martes sila nakahibawo sa insidente.

Matod ni Ermita, kinsa silingan ni Castro nga mamalitay untag mga tamatis niini, maoy nakadiskubre sa lawas.

Gibutyag ni Ermita nga ang silingan nga suki mangumpra unta sa giugmad nga mga tamatis ni Castro, apan nahibulong siya kay samtang gisampit, wa motubag.

Ilang gisusi sa umahan niini hangtud nga naabot sila sa alad sa baboy.

“Nakugang sila, Sir kay nagkadugo naman ang biktima asta ang baboy. Abi nilag gibugno kay maldita kuno to nga anay,” dugang ni Ermita.

Ilang nakita nga ang duha ka mga tudlo sa tuong kamot ni Castro nangaputol na kay gikaon sa anay.

Ilang gitawag dayon ang mga silingan ug kabanay dayon gisusi nila ang lawas.

Lain sab nilang gituohan nga nag high blood pressure si Castro kay na-stroke na kini mga duha ka tuig na ang nakalabay.

Misamot ang ilang pagduda nga dunay foul play ang kamatayon niini kay dunay usa ka kabhang sa kalibre .45 duol sa lawas ni Castro.

Sa paghiling sa mga sakop sa Scene of the Crime Operation (Soco) nasuta nga dunay usa ka samad pinusilan si Castro ubos sa iyang tuong mata.

Naay silingan mitug-an sa kapulisan nga nakadungog silag usa ka buto sa armas sayo sa buntag apan wa lang sila makakita kinsa ang gipusil ug namusil.

Usa ka anak ni Castro nitug-an sa kapulisan nga nag-inusara na lang ang ilang inahan nga nag-uma. Sa pagkakaron bangi sa yuta maoy usa sa motibo nga ilang gisubay.

Nasuta nila nga niadtong milabayng semana si Castro gipatawag sa barangay kapitan tungod kay gireklamo nga nanigbas sa iyang silingan.

Ang maong tawo usa ka karon sa persons of interest sa kapulisan nga gikatahong mao ray gikaaway ni Castro tungod sa bangi sa utlanan sa ilang yuta.

Gikatakdang ilang ipatawag ang maong silingan. (GPL)


Source: Sun.Star Superbalita (https://www.sunstar.com.ph/article/1861294/Superbalita-Cebu/Balita/Ginang-67-gipusil-patay-bangi-sa-yuta-motibo?ref=rss&format=simple&link=link)

No comments