Recent Posts

Breaking News

Ferro: 12 ka barangay hugtan og bantay


GIKLARO ni Police Regional Office (PRO)-Central Visayas Chief Brigadier General Albert Ignatius Ferro nga ilang hatagan og igo nga pagtagad ang mga barangay nga adunay daghang mga kaso sa virus.

Kini nagpasabot nga butangan nila og mas daghang security personnel ang mao nga mga dapit aron mapatuman nga mas estrikto ang mga protocol sa enhanced community quarantine.

Kon buot sabton, matod ni Ferro, ang tibuok Cebu City ubos na sa lockdown sukad nga ubos kini sa ECQ.

"ECQ is about lockdown. So, it’s lockdown all the way. Ang term lang natin is ECQ. So the people are advised to stay at home. So that's lockdown. And come up with the consideration of the Apor (authorized person outside residence) and essentials," padayag ni Ferro sa interbyu sa Superbalita Cebu.

Tubag kini ni Ferro sa balita nga dunay 12 ka mga barangay nga ipailawom sa hard lockdown.

Ang 12 ka mga barangay nga dunay taas nga mga kaso sa Covid-19 giila ni Environment Secretary Roy Cimatu nga mao ang Sambag 1, Sambag 2, Kamputhaw, Mabolo, Basak San Nicolas, Guadalupe, Duljo Fatima, Lahug, Tinago, Tisa, Ermita, ug Tejero.

Ang tibuok Cebu City ubos na sa ECQ sugod niadtong Hunyo 16. Mao kini ang bugtong dapit sa Pilipinas nga ubos sa labing hugot nga quarantine level.

Ang pangulo sa PRO-Central Visayas niingon nga ang maong mga barangay maoy ilang tutokan og maayo aron makontrolar ang kalihukan sa mga tawo.

Mao ra kini ang kalainan niini sa ubang mga dapit sa Dakbayan sa Sugbo.

"We call them focused barangays. We focused on high incidents of positive Covid cases," matod ni Ferro.

Niadtong Martes sa gabii, gikanselar ni Mayor Edgardo Labella ang tanang 250,000 quarantine passes. Busa, way bisan usa nga gitugotang makagawas sa balay gawas lang niadtong exempted ug kadtong mamalit og mga nag-unang panginahanglan, sama sa pagkaon ug tambal. (PAC)


Source: Sun.Star Superbalita (https://www.sunstar.com.ph/article/1861367/Superbalita-Cebu/Balita/Ferro-12-ka-barangay-hugtan-og-bantay?ref=rss&format=simple&link=link)

No comments