Recent Posts

Breaking News

DILG mokiha sa mga kapitan nga magpabaya


ANG Department of the Interior and Local Government (DILG) mopasaka og kaso sa mga barangay kapitan nga di makapatuman sa mga executive order nga luwatan isip mga lakang batok sa coronavirus disease (Covid-19) sa Dakbayan sa Sugbo.

Kini ang gibutyag ni DILG Assistant Secretary Alexander Macario, kinsa niingon nga sa miaging mga buwan, daghan sila og napasakaan og kasong administratiba nga mga kapitan nga pakyas pagpatuman sa mga lagda sa Inter Agency Task Force.

Matod ni Macario nga suma sa ilang kasinatian nga kon way kooperasyon ang kapitan sa usa ka barangay, managhan ang mga kaso sa Covid-19 sa dapit.

“We all know that the frontliners in this pandemic are the local chief executives, especially the punong barangay. And without the cooperation of the barangay captain, for sure we are doomed to fail,” matod ni Macario.

Si Macario nidugang nga human ilang masuta nga ang kapitan adunay pagpabaya, ilang padad-an og show cause order.

Kon dili sila matagbaw sa tubag, ang kaso ilang isang-at ngadto sa Ombudsman.

“(One of) the practices that we have done in other parts of the country during ECQ was, we filed cases against the punong barangay who intentionally failed to implement the Bayanihan Act in their respective localities,” padayag ni Macario.

Si Kapitan Jerome Lim sa Barangay Sta. Cruz nisuporta sa pamahayag sa DILG.

“Sakto na sila. Angayan gyud pahamtangan og silot kanang barangay official nga tapulan. Kami buhis buhay na among pagserbisyo. Wa mi kahibawo naa ba nay sakit o wala, atubangon na namo tungod aning problemaha,” butyag ni Lim. (PAC)


Source: Sun.Star Superbalita (https://www.sunstar.com.ph/article/1861553/Superbalita-Cebu/Balita/DILG-mokiha-sa-mga-kapitan-nga-magpabaya?ref=rss&format=simple&link=link)

No comments