Recent Posts

Breaking News

Dalan nga mi-landslide sa Kapatagan maagian na


DIGOS CITY -- Maagian na ang dalan nga nasirhan sa midahiling yuta atol sa pagbunok sa kusog nga uwan niadtong Huwebes sa gabii, Hunyo 4, 2020.

Ang insidente mikalas sa kinabuhi sa magsuong menor nga mga lalaki sa Sitio Batangon, Barangay Binaton ning dakbayan, alas 10 sa gabii niadtong adlawa.

Alas 2 sa kaadlawon, Biyernes, dihang naugkat sa mga personahe sa City Disaster Risk Reduction and Management Council (CDRRMC) ang patay’ng lawas sa magsuong Roniel Jay Laguna, 13, ug Roxel, 10.

Suwerteng naluwas ang 7-anyos nga manghod sa mga biktima nga si Sasang, ama-ama nga si Dommy Aquil, 31, ug inahan nilang si Mary Jean, 29.

Sumala ni Lieutenant Colonel Vici Anthony Tababa, hepe sa Digos City Police Office, natulog na ang mga biktima dihang nahugno ang ilang balay human natabunan sa mi-landslide.

Apil sa namatay ang binuhing iro sa pamilya.

Ang mga biktima gisuwayan pa pagdala sa Llanos Hospital sa Barangay Zone 1 ning siyudad apan gideklarang wa na’y kinabuhi sa mga nag-atimang doktor.

Gihulagway sa kapulisan nga ang kuwarto sa mga biktima duol sa dalan nga natabunan sa yuta ug miharang ang nangahulog nga mga bato, hinungdan nga wa dayon naagian sa mga sakyanan ang dalan padung sa Barangay Kapatagan ug padung sa sentrong parte sa dakbayan.

Sa taho sa Philippine Atmospheric Geophysical and Astronomical Services Administration (Pagasa), masinati ang mga pag-uwan sa nagkadaiyang parte sa Mindanao tungod sa presensya sa Inter-Tropical Convergence Zone nga ania sa Southern Mindanao ug easterlies nga masinati sa ubang parte sa nasud.


Source: Sun.Star Superbalita (https://www.sunstar.com.ph/article/1859259/Superbalita-Davao/Balita/Dalan-nga-mi-landslide-sa-Kapatagan-maagian-na?ref=rss&format=simple&link=link)

No comments