Recent Posts

Breaking News

Daghang supak sa anti-terror bill


WALO ka mga grupo sa mga negusyante, ang De La Salle brothers ug mga pari nga Jesuit naghiusa uban sa daghang mga sektor sa pagsaway sa paglaktaw sa bag-ong anti-terrorism bill sa Ubos Balay Balauranan.

Nipadayag sila sa pagsupak sa pipila ka mga probisyon sa balaudnon.

Sa ilang hiniusang pamahayag nga giluwatan sa Biyernes, Hunyo 5, ang mga grupo sa mga negusyante niingon nga ang balaudnon, Senate Bill 1083 ug House Bill 6875, “highly divisive - because it poses clear and present danger to human rights enshrined in our Constitution - at a time when our nation needs to come together as one.”

“We are all suffering and fighting for survival: businesses are closing down, people are losing their jobs, those who still have jobs find it impossible to find safe transportation to work, our children are going hungry and the continuity of their education is under threat,” matod nila.

Ang mga namirma mao ang Bishops-Businessmen’s Conference for Human Development, IT and Business Process Association in the Philippines, Investment House Association of the Philippines, Judicial Reform Initiative, Management Association of the Philippines, Makati Business Club, Philippine Business for Education, ug Subdivision and Housing Developers Association.

Ilang giawhag ang mga lider sa nasod ug pribadong sektor nga motutok hinuon sa paghimog mga polisiya alang sa pagtubag sa mga sulirang ekonomikanhon nga mugna sa coronavirus disease (Covid-19) pandemic, lig-unon ang sistema sa panglawas ug palambuon ang kahimtang sa pagbubo og puhonan aron momugna og daghang mga trabaho.

AKADEMIYA

Pito ka De La Salle administrators pinangulohan ni Brother Armin Luistro ug siyam ka Ateneo administrators pinangulohan ni Father Primitivo Viray Jr. niluwat usab og hiniusang pamahayag aron hugot nga ipadayag ang ilang pagsupak sa balaudnon nga wa matukma sa panahon.

Sa ilang pamahayag, ilang giawhag si Presidente Rodrigo Duterte nga maminaw sa pakiluoy sa katawhan ug supakon ang balaudnon.

“We can then all work together to craft a better version that can uproot terrorism while addressing the people’s concerns about their basic rights. By so doing, we will not be divided in countering terrorism,” sila nagkanayon.

Sila nabalaka sa daghang mga probisyon sa balaudnon nga way klaro ug malahi ang pag-interpret.

Ilang gitumbok ang daghang mga probisyon sa balaudnon nga way klaro nga kuyaw nga lainon ang pagsabot.

Sila nipahimangno nga sa dautang mga kamot, ang balaudnon mahimong magamit sa pagpanaugdaug sa katawhan.

GIPANALIPDAN

Si Philippine National Police (PNP) Chief Archie Gamboa niingon nga ang balaudnon nga gisaway og maayo mopalig-on sa kapabilidad sa kagamhanan sa pagpanalipod sa katawhan ug teritoryo nga gihulga sa mga teroristang grupo, di lang sa Pilipinas, apil na sa abroad.

“The amendments to the Human Security Act of 2007 that were introduced in the Anti-Terrorism Act of 2020 will update and strengthen the country’s anti-terrorism policies,” nagkanayon si Gamboa.

Iyang gitumbok ang mga pagpangatake sa mga terorista sa New York sa 2001, London sa 2005, Rizal Park sa Manila sa 2000 ug Marawi siege sa May 2017 nga nikalas og liboan ka mga kinabuhi.

“We can only say better late than sorry even if we are the latest country in Asia-Pacific to pass a law that ciminalizes terrorism. But definitely there ought to be a law,” nagkanayon si Gamboa.

Sa iyang bahin, si Armed Forces of the Philippines (AFP) spokesperson Brigadier General Edgard Arevalo niingon nga ang bag-ong balaud di mohatag kanila og dugang gahom kay di kaayo kini dakog kalainan sa balaud nga anti-terror sa 2007. (TPM, MVI, SunStar Philippines)


Source: Sun.Star Superbalita (https://www.sunstar.com.ph/article/1859201/Superbalita-Cebu/Balita/Daghang-supak-sa-anti-terror-bill?ref=rss&format=simple&link=link)

No comments