Recent Posts

Breaking News

Daghang aktibidad sa Davao del Sur nabalik sa MGCQ


DIGOS CITY -- Gitugtan na sa lokal nga gobyerno ning dakbayan ang pagbalik sa mga relihiyosong aktibidad ug mga non-contact sports sama sa walking, jogging, biking, golf, swimming, tennis, badminton, equestrian ug skate boarding apan wa gitugtan ang basketball ug volleyball.

Sa mga mass gatherings sama sa pagsimba, anaa lamang sa 50 porsyento ang gitugtang nga motambong.

Kun ugaling makabalik na ang byahe sa mga pampublikong sakyanan gikan ug padung sa Davao City, tag usa lamang ka byahe matag adlaw ang mahimong mobyahe ug kini gikan adlaw'ng Lunes hangtud Sabado sa alas 8 lamang sa buntag.

Giklaro sa polisiya nga "terminal-to-terminal lamang ang biyahe ug wa'y mahimong mokanaog ug mosakay sa kadalanan. Wala pa sab gitugtan ang byahe gikan sa dakbayan padung sa ubang munisipyo.

Gibutyag ni Mayor Josef Cagas nga nagpabilin ang pagdili sa mga nag-edad og 20 anyos paubos ug 60 anyos pataas nga makagawas sa ilang balay, apil ang mga masakiton ug mga babayeng buntis.

Sa mga moadto sa merkado publiko ug mga malls, gikinahanglan gihapon ang pagdala og Quarantine Pass (QP) apil sa ubang mga pag-adto sa ubang mga lugar sa siyudad.

Giklaro sa amahan sa siyudad nga siya mismo buot nga ipailawom pag-usab sa 14 ka adlaw nga kwarentinas ang Digos, apan masinati na sab ang kagutom ug mabalda ang mga trabaho mao nga gikinahanglan nga molihok ang mga aduna'y panginabuhian.

Matod ni Cagas nga gitun-an na niya ang pagdugang na og mga isolation facilities, Rapid Diagnostic Test (RDT) kits, ug paggamit og Global Positioning System (GPS) sa paghimo sa contact tracing.

Gitug-an sa opisyal nga sukad nagsugod ang lockdown hangtud niadtong buwan sa Mayo, apektado na ang ekonomiya sa dakbayan mao nga nahanaw ang kitaon unta sa lokal nga gobyerno nga kapin P50 milyones. (Orlando B. Dinoy)


Source: Sun.Star Superbalita (https://www.sunstar.com.ph/article/1858687/Superbalita-Davao/Balita/Daghang-aktibidad-sa-Davao-del-Sur-nabalik-sa-MGCQ?ref=rss&format=simple&link=link)

No comments