Recent Posts

Breaking News

Curfew, sayo nga pagsira sa establisemento estriktong ipatuman sa Liloan


SUGOD sa Huwebes, Hunyo 25, ipatuman na ang mas sayo nga curfew sa lungsod sa Liloan.

Kini sugod alas 8 sa gabii hangtod na sa alas 5 sa buntag, pahibawo ni Liloan Mayor Christina Garcia-Frasco isip usa sa mga lakang batok sa coronavirus disease (Covid-19) nga hinayhinay nga nanakod sa lungsod.

Ang madakpan pahamtangan og silot nga community service ug pasakaan og kaso.

"We have decided to impose these stricter measures now in order to prevent the current situation from getting worse, and hopefully, to reduce the risk of having more positive cases," matod ni Frasco.

Tungod niini, niluwat ug kamandoan si Frasco sa Hunyo 23 nga mao ang Executive Order 2020-11 nga naglatid sa mga gidili ug gitugot sa mga konstituente niini.

Sayo manira

Subay sa kamandoan, kinahanglan nga manirado na ang pampubliko ug pribado nga merkado sa alas 6 sa gabii. Samtang manirado na usab sa alas 7 ang tanan nga mga establisimento.

Gilimitahan usab gikan alas 6 sa buntag hangtod na sa alas 8 sa buntag ang pagkaligo sa dagat. Alang sa mga magpaugnat sa kusog, mahimo kining buhaton sa alas 6 sa buntag hangtod sa alas 8 sa buntag ug alas 5 sa hapon hangtod sa alas 7 sa gabii. Gikinahanglan nga magdala og quarantine pass.

Bisan kon ubos sa general community quarantine ang lungsod, gidili ang pagpundok, tigbakay ug uban pa.

Ang dili motuman sa kamandoan, dakpon, pasakaan og kaso ug pahamtangan sa tukmang silot.

"Barangay captains are also directed to impose mandatory eight-hour community quarantine for violators which shall include activities such as making of hand sanitizer and disinfectants, making of personal protective equipment, planting of vegetable seedlings, disinfection and cleaning of streets, beaches, canals and other waterways", saysay ni Frasco.

Aron malikayan ang pagkuyanap sa kagaw sa lungsod, dili tugotan nga makagawas o makasulod sa lungsod ang mga indibidwal nga na stranded gikan o padulong sa dakbayan sa Sugbo.

Gawas lang kon nalakip kini sa listahan sa mga essential workers.

"Pursuant to the directive of the DILG, Locally Stranded Individuals (LSI) coming from or going to Cebu City shall not be allowed," saysay ni Frasco. (ANV)


Source: Sun.Star Superbalita (https://www.sunstar.com.ph/article/1861237/Superbalita-Cebu/Balita/Curfew-sayo-nga-pagsira-sa-establisemento-estriktong-ipatuman-sa-Liloan?ref=rss&format=simple&link=link)

No comments