Recent Posts

Breaking News

CTMS: pagpanakop sa backrider way gipili


Giklaro sa pangulo sa City Traffic Management System CTMS sa dakbayan sa LapuLapu nga si Mario Napule nga wala silay gipili sa ilang pagpanakop sa mobackride sa mga motorsiklo sa dakbayan.

Kini ang tubag ni Napule sa pangutana sa pipila ka mga netizens human nga adunay hulagway nga nikatap sa social media nga adunay nag-angkasay sa motorsiklo nga posibleng kawani sa Lapu-Lapu City Hall.

Sumala ni Napule tinuod nga mga empleyado kadto sa city hall ang anaa sa hulagway apan dili kini personnel sa CTMS nga maoy taho sa uban. Gipatawag na sab ang ilang atensyon sa kagamhanan gumikan sa maong binuhatan.

Matod ni Napule, wala lang siguro kini mabantayi sa iyang mga tawo hinungdan nga wala masita. Dugang niya nga moabot na gani sa 100 kapin ka mga indibidwal ang ilang na-isyuhan ug citation ticket sukad nga gipaubos ang dakbayan sa community quarantine niadtong Marso gumikan sa pagpa-backride sa motorsiklo.

Lakip sa ilang gidakop ang mga magtiayon ug ubang nag-angkasay nga anaa ra duol sa ilang mga panimalay.

Karon nga anaa na sa general community quarantine (GCQ) ang dakbayan hayan ila na usab gipabalik ang uban nilang personnel sa pagtutok sa mga kadalanan sa dakbayan nga sagad hugopan na sa mga motorista. Itandi kaniadto nga ang sagad sa ilang focus anaa sa mga checkpoint.

Aduna usab silay mga roving personnel nga mosita sa mga motorista. Subling gipahimangnoan ni Napule ang mga Oponganon nga mosubay sa kamanduan sanglit wa pa itugot backride samtang anaa pa sa community quarantine ang dakbayan.

Lakip sa iyang gipahinumdoman ang iyang mga personnel nga dili usab mosupak sa lagda sa backriding.

“Samot na akong personnel mahibaw-an nako unya makuha gyud ang (identity) suspensohon gyud nako kay di man maayo kitay implementor unya kitay di mosunod ug moingon dili, dili gyud. Ug moingon pwedi na, pwedi na,” matod ni Napule. / GCM


Source: Sun.Star Superbalita (https://www.sunstar.com.ph/article/1859133/Superbalita-Cebu/Balita/CTMS-pagpanakop-sa-backrider-way-gipili?ref=rss&format=simple&link=link)

No comments