Recent Posts

Breaking News

Covid positive nga pasyente, miambak


USA ka pasyente sa coronavirus disease (Covid-19) niambak gikan sa ikatulong andana sa Vicente Sotto Memorial Medical Center (VSMMC), kagahapon sa buntag, Martes, Hunyo 9, 2020.

Ikaduhang higayon na tu nga nisuway sa paghikog si Kim Falcutelo Villostubo, 48, taga dalan Tres de Abril, Barangay Labangon, Cebu City.

Gikan sa ikatulong andana sa si Villostubo. Iyang gibuak ang bildo nga bintana ug siya mitugpa sa sementado nga emergency ramp.

Ang hepe sa Abellana Police Station, Police Major Elisandro Quijano, nagkanayon nga nakit-an pa sa mga tawo si Villostubo nga mibuak sa bildo nga bintina diha sa iyang lawak diin siya gi-isolate uban sa laing pang nagpositibo sa coronavirus disease.

“Ang iyang bed gud duol ra kaayo sa bintana basin pud wa magdahom mga kauban niya kalit lang miambak,” matod ni Quijano.

Samtang si Bryan Garcia, taga-Basak Pardo, Cebu City ug janitor sa VSMMC, nibutyag ngadto sa Superbalita Cebu nga gikan si Villostubo sa Room 301 sa third floor, diin naa tanan ang nagpositibo sa coronavirus.

Sumala pa ni Garcia, nanglimpiyo siya sa third floor atong higayona.

Iyang nabantayan nga si Villostubo nagsige og singgit nga nagpadayag og pagmahay sa iyang relihiyon.

KAGUOL?

Gituohan nga hayan naguol si Villostubo sa iyang sitwasyon ilabi na nga way sakop sa iyang banay ang mamahimong makaduaw kaniya sa tambalanan.

“Kaduha na ni niya nga pag-ambak. Nagyawyaw siya nga dili daw makatabang iyahang relihiyon. Singgit-singgit taman nya kalit lang may nilugapak og didto na siya sa ubos,” asoy ni Garcia.

Sumala pa niini nga sa dihang nagkaguliyang dali niyang gisusi og si kinsa ang nilayat. Nakurat nalang siya nga ang lalake nga nagpunay og singgit maoy naghikog.

Namatikdan sab ni Garcia nga kanunay nga nagmagul-unon si Villostubo, samtang ang ubang pasyente sa third floor adunay magyawyaw, adunay mokanta, lain ang maghilak, samtang siya manglimpyo sa maong lawak.

BANTAYAN

Dugang ni P/Major Quijano nga gumikan sa maong insidente giawhag ang mga security personnel sa VSMMC nga matag karon ug unya nga adunay regular nga roving, aron dili na masubli pa ang panghitabo.

Si Atty. Paul Gino Lopez, chief administrator sa VSMMC, nagkanayon nga (atol niining pagsuwat) kasamtangan nga anaa pa sa ilang morgue ang lawas ni Villostubo ug wa pa ma-cremate kay walay cremation facility ang VSMMC.


Source: Sun.Star Superbalita (https://www.sunstar.com.ph/article/1859560/Superbalita-Cebu/Balita/Covid-positive-nga-pasyente-miambak?ref=rss&format=simple&link=link)

No comments