Recent Posts

Breaking News

Checkpoints sa kapulisan sa Lapu-Lapu gihigpitan


Gimandoan ni Lapu-Lapu City Office (LCPO) Director Police Colonel Clarito Baja ang tanang police stations ubos sa iyang kamandoan nga hingusgan ang pagpahigayon og random checkpoints.

Kini human nga nisiaw ang riding-in-tandem nga suspek sa sunodsunod nga kaso sa pagpamusil sa dakbayan sa milabayng tulo ka mga adlaw.

Gawas niini, gimandoan usab ni Baja ang Mobile Patrol Group (MPG) sa LCPO nga mopahigayon og [ag-roving libot sa dakbayan gamit ang MPG patrol aron paghingusog sa police visibility.

Gibutyag ni Baja nga karon nga ubos na sa general community quarantine (GCQ) ang Lapu-Lapu nga mo-focus na lang sa ilang checkpoints sa upat ka border control points sa kapulisan sa duha ka taytayan sa nga nagdugtong sa Mandaue ug Lapu-Lapu.

Hinungdan sa pagkakaron ang mga police station duna nay giumol nga mga personnel nga mag kanunay pagpahigayon og checkpoint.

“Karon akong gi re-aligned ang ubang personnel para mo conduct ug checkpoint sa ilang area of responsibility kung dunay makit-ang nag backride dakpon dayon kay bawala paman kini,” matod ni Baja.

Usa sa gitan-aw karon sa kapulisan ang posibilidad nga posibleng konektado ang nahitabong pagpamusil sa milabayng mga adlaw.

Kini gumikan kay parehas ug apelido ang ubang mga biktima ug nahitabo ra usab sa mga kasikbit nga mga dapit sa dakbayan.

Susama usab ang paghulagway sa gunman nga nakamotorsiklo ug kalibre .45 nga armas ang gamit base usab sa mga kabhang ug basiyo sa bala nga nakuha sa kapulisan sa crime scene.

Gimandoan na ni Baja ang mga imbestigador sa mga police station diin nasakop ang mga uwahing pagpamusil sa dakbayan sa pagpalawom sa ilang pakisusi labi na sa background sa mga biktima aron masuta ang nagpahiping motibo sa mga pagpamusil.

Giawhag usab niya ang mga Oponganon sa pagpabiling kalma sanglit kontrolado ra sa kapulisan ang peace and order situation sa dakbayan bisan sa insidente sa pagpamusil sa milabayng adlaw.

“Ang atong kapulisan naa man permi kay ato ning gipahugtan pa basin nakaingon ang walay dautang huna-huna nga kay naay Covid wala na ta mo focus pero naka focus gihapon ta sa tanang krimen drugs, gambling ug uban pa wala ta mohunong,” pagpasabot ni Baja. / GCM


Source: Sun.Star Superbalita (https://www.sunstar.com.ph/article/1858989/Superbalita-Cebu/Balita/Checkpoints-sa-kapulisan-sa-Lapu-Lapu-gihigpitan?ref=rss&format=simple&link=link)

No comments