Recent Posts

Breaking News

Chan Covid-free na


GIANUNSIYO ni Lapu-Lapu City Mayor Junard Chan nga Covid-free na siya base sa labing awahing resulta sa iyang swab test nga nigawas kagahapon, Miyerkules, Hunyo 24.

Niadtong Hunyo 12, pinaagi sa usa ka recorded video atol sa kasaulogan sa Independence Day sa Lapu-Lapu, gipahibawo ni Chan nga nagpositibo siya sa Covid-19 diin nagsugod siya og isolate human sa pagkuha sa iyang unang swab test niadtong Hunyo 10.

“Dako nakong kalipay nga ipahibawo kaninyong tanan nga nagnegatibo na kita sa Covid-19 human sa 14 kaadlaw nga isolation gikan sa atong pag-swab niadtong Hunyo 10 diin kita nagpositibo,” asoy ni Chan sa iyang Facebook post.

Gihulagway ni Chan ang suporta nga gipakita sa publiko maoy nakahatag niya og kadasig aron maayo.

“Natandog ako sa tanang mensahe sa pagsuporta nga inyong gipadangat kanako. Enay maluya, mas nadasig ako nga magpaayo dayon aron makabalik na ako sa pagpangalagad kaninyo. Ang inyong makabungog nga suporta ug pagdasig inubanan sa inyong hugot ug makanunayon nga pag-ampo maoy naghatod kanako sa paspas nga recovery,” asoy sa mayor.

Gipanglatawan sa mayor nga makabalik na sa trabaho aron pangulohan ang kampanya batok Covid-19

Base sa labing awahing datus niadtong Hunyo 23, nisaka sa 304 ang ihap sa kaso sa Covid-19 sa Lapu-Lapu human nakatala ang dakbayan og 42 ka bag-ong kaso nga maoy labing dako nga pagsaka sa kaso sulod sa usa ka adlaw.

Gipasabot ni Chan pinaagi sa iyang laing Facebook post nga kadaghanan sa mga bag-ong kaso gikan sa gipahigayong contact tracing.

“Sa panahon karon, kinahanglan kita nga makat-on base sa findings sa milabayng mga kaso para dili na mapun-an ang infected individuals sa siyudad,” asoy ni Chan. (NDT)


Source: Sun.Star Superbalita (https://www.sunstar.com.ph/article/1861297/Superbalita-Cebu/Balita/Chan-Covid-free-na?ref=rss&format=simple&link=link)

No comments