Recent Posts

Breaking News

Cebu City moisyu og QR code


ARON di magdungan pagpanggawas ang mga tawo, bahinhinon ang mga barangay ug hatagan og adlaw diin ang ilang mga lumolupyo mahimong makagawas aron makapamalit ug paghimo sa uban pang importanteng mga lakaw.

Apan gikinahanglan nila nga magdala og QR code nga ipuli sa quarantine pass nga gipangkanselar sa Dakbayan sa Sugbo.

Si Cebu City Mayor Edgardo Labella nihulagway niini nga clustering, kansang tumong mao ang pagpamenos sa mga tawo nga manggawas sa tagsa kapanimalay samtang ang dakbayan naa pa sa enhanced community quarantine (ECQ).

Si Labella nibutyag nga iyang gipangkanselar ang 250,000 ka green pass nga iyang giisyu niadtong Marso human sa rekomendasyon ni Department of the Interior Secretary Eduardo Año.

Matod ni Labella nga daghan ang mga nangadakpan sa grupo ni Raquel Arce, pangu sa Cebu City Covid Action Team, nga nanglapas sa quarantine protocol sa Dakbayan sa Sugbo.

“There are also many violators of the minimum protocol that they are supposed to stay home. Unless the purpose of going out is to buy food or medicine,” paghulagway ni Labella.

Si Año, kinsa niduaw sa Dakbayan sa Sugbo uban kang Environment Secretary Roy Cimatu, Department of Health Secretary Francisco Duque III ug uban pang mga sakop sa Inter Agency Task Force (IATF), nakakita sa kadaghan sa mga tawo sa karsada.

Kini ang hinungdan nga iyang gisultihan si Labella sa pagkanselar sa mga quarantine pass sa Martes sa gabii, Hunyo 23, 2020.

Si Labella niseguro nga way pagpangabuso nga himuon ang mga opisyal sa Siyudad ug kapulisan sa pagpanakop.

Kon naa man gani, andam ug bukas ang iyang buhatan sa mga mangreklamo.

“If you are positive that the police has committed an infraction, then come to my office,” nagkanayon ang mayor.

NAGPAHIMUS

Si Labella, sa usa ka press conference sa Seda Hotel sa Cebu Task Force on Covid-19, uban kang Cimatu, Gobernador Gwendolyn Garcia, niangkon nga dihang ilang giisyu ang quarantine pass, wa silay ensaktong kasayuran sa tukmang gidaghanon sa mga panimalay. Iyang nasayran nga dunay mga panimalay nga dunay tagtulo, upat ngadto sa lima ka mga pass.

“There was not very strategic and selective issuance,” matod ni Labella.

Ning higayuna, iya nang seguruon nga matag panimalay, usa ra ka pass ang mahatag.

Makigtambayayong siya sa Police Regional Office (PRO) 7 pinaagi kang Police Brigadier General Albert Ignatius Ferro.

Niini, ang mga barangay kapitan ug kapulisan na ang moapod-apod sa matag panimalay sa mga barangay.

Makigtagbo siya kang Ferro sa Huwebes, Hunyo 25, ug uban pang mga opisyal aron ilang tukion ang mga mekanismo sa pag-apod-apod sa pass.

Sa pagkakaron, samtang wa pay QR code, iyang giawhag ang mga Sugboanon nga magpabilin una sa balay.

Iyang gihangyo ang publiko nga magpasensya lang una sud sa pipila ka mga adlaw aron mahuman na ang kalbaryong nasinati niini tungod sa Covid-19.

“Antos lang tag dyutay,” matod sa mayor, ug motuman sa mga protocol nga gilatid sa DOH.

Matod ni Labella nga mao usab kini ang kagustohan ni Presidente Rodrigo Duterte. “We should respond to the call of the President,” matod niya.

Gimanduan ni Labella si City Administrator Floro Casas Jr., sa pagpadali sa mga QR Code.

Samtang wala pa ang QR Code, ang mayor nagkanayon nga kadtong frontliners, trabahante sa essential companies ug ubang mga APOR, mopakita lang sa ilang mga identification cards ug certificate of employment sa higayon nga moagi sila sa border checkpoints ug random checkpoints sa lainlaing dapit sa dakbayan.

Iya usab nga gisaad nga dunay umaabot nga hinabang ang Siyudad sa matag panimalay human giaprobahan sa City Council ang P500 milyunes alang niini.

Makigtagbo usab siya sa Department of Social Welfare and Services (DSWD) kon unsa nga hinabang ang mahatag niini.

MAAYOG KALAMBUAN

Si Cimatu, sa iyang bahin, niingon nga duna siyay nakita nga maayong kalambuan sa nanglabay nga mga adlaw base sa ilang tigom tali sa mga lokal nga opisyal.

“We found out that the situation is improving,” matod ni Cimatu.

Apan iyang giangkon nga daghan pa sila og tukion kon unsaon sa pagpatuman sa ECQ sa Dakbayan sa Sugbo.

Karong adlaw, Hunyo 25, laing panagtigom ang iyang pagahimuon aron kini matuki og maayo uban sa kapulisan ug mga barangay kapitan.

BORDER CONTROL

Samtang si Garcia nipahibawo sa iyang pagpahugot og balik sa mga border control tali sa Dakbayan sa Sugbo ug Lalawigan.

Iyang gipasabot nga ang lakang gitumong aron pagpanalipod sa katawhan sa Lalawigan.

Iyang nabantayan nga suds a 23 ka mga adlaw nga iyang gipalugakan ang border control sukad gipailawom ang Lalawigan sa general community quarantine (GCQ), nanaghan ang mga kaso sa Covid-19.

“We have to close our borders,” matod sa gobernador.

Apan iyang giklaro nga di kini pagpiit sa siyudad, kon di aron pagpaminos sa mga kaso sa Covid. (PAC, REV)


Source: Sun.Star Superbalita (https://www.sunstar.com.ph/article/1861316/Superbalita-Cebu/Balita/Cebu-City-moisyu-og-QR-code?ref=rss&format=simple&link=link)

No comments