Recent Posts

Breaking News

Cebu City di pa haum nga mag-MGCQ


DAKBAYAN sa Sugbo di pa angay nga ipaubos sa modified general community quarantine (MGCQ) human sa Hunyo 15 tungod kay taas pa ang mga kaso sa coronavirus disease (Covid-19).

Ang Siyudad maoy dunay labing taas og mga kaso sa Kabisay-an ug usa sa labing taas sa nasod.

Alang kang Police Regional Office (PRO) 7 chief Brigadier General Albert Ignatius Ferro, kinsa sakop usab sa Regional Inter Agency Task Force, di pa andam ang Siyudad sa Sugbo alang sa mas luag nga MGCQ.

Ang MGCQ maoy pangandam alang sa “bag-ong normal.”

Ang baruganan ni Ferro nahaum usab sa kang Mayor Edgardo Labella, kinsa gustong magpabilin ang Cebu City sa GCQ.

Atol sa meeting sa regional IATF uban kang Secretary Carlito Galves Jr., chief implementer sa national policy against Covid-19, adunay sugyot nga ipaubos na sa MGCQ ang ubang bahin sa Central Visayas nga dili na kaayo apektado sa virus.

Matod ni Ferro nga sa iyang bahin, isip sakop sa IATF, aron pabilin nga luwas ang mga tawo, di pa kinahanglan nga mag MGCQ ang dakbayan sa Sugbo.

“Sa ako lang, para safe lang, we maintain the GCQ standard lang muna para we could gradually move to a more safe status. Kasi pag nag MGCQ ta, ang mobility sa tao is tanan pwede na maga-move, maga go outside,”pasabot ni Ferro.

GIDAYEG

Atol sa meeting, si Galvez nakadayeg hinuon sa gihimo sa Kagamhanan sa Dakbayan ug Lalawigan sa Sugbo tungod kay adunay mga pamaagi nga maatiman ang tanang nag positibo sa Covid-19.

Bisan pa man nga nisaka ang numero sa natakboyan, kapin sa 50 porsiyento usab nangaayo na.

Gipasabot usab sila sa Department of Health (DOH) atol sa tigom sa IATF nga ang pagdaghan sa mga nataptan sa Covid gumikan sa nalangay nga resulta sa swab test, di bag-ong mga kaso. Ang Siyudad dunay 3,434 ka mga kaso sa Covid-19 sa Hunyo 13, 1,858 niini nangaayo na.


Source: Sun.Star Superbalita (https://www.sunstar.com.ph/article/1860029/Superbalita-Cebu/Balita/Cebu-City-di-pa-haum-nga-mag-MGCQ?ref=rss&format=simple&link=link)

No comments