Recent Posts

Breaking News

‘Cebu 8’ gibuhian sa kapulisan


GIBUHIAN na kagabii, Lunes, Hunyo 8, sa Cebu City Police Office (CCPO) ang walo ka mga aktibista nga ilang gidakop niadtong Biyernes atol sa anti-terrorism bill rally atubangan sa University of the Philippines (UP) Cebu sa Barangay Lahug, Dakbayan sa Sugbo.

Usa sa mga gidakop niingon nga igo ra siyang niagi atol sa hitabo. Ang walo nakagawas human nimando si Cebu City Municipality Trial Court in Cities (MTCC) Branch 4 Judge Jenelyn Villaceran Forrosuelo.

Kini samtang gikondenar sa UP Cebu ang pagsulod sa kapulisan sa tugkaran sa campus ug pagdakop sa mga raliyesta nga ni-exercise lang sa ilang katungod sa pagpadayag.

Ang gibuhian mga pasado alas sa 6 sa gabii gikan sa Waterfront Police Station mao sila si Nar Athena Mae Porlas, Joahanna Veloso ug Bernie Cañedo nga mga tinun-an sa UP; April Dyan Gumanao sa Kabataan party-list; Jaime Paglinawan sa Bagong Alyansang Makabayan; Janry Ubal sa Food Not Bombs, ug Al Ingking, alumnus sa UP.

Ang ikawalo mao ang 19 anyos nga si Clement Corominas Jr., kinsa niingon nga niagi lang siya dihang gidakop.

Sa iyang mando sa pagpalingkawas sa walo, si Forrosuelo wa motakda og piyansa.

Sila gipasakaan og mga kasong kalapasan sa Batas Pambansa (BP) 880 kun The Public Assembly Act of 1985; Republic Act 11332 kun “Mandatory Reporting of Notifiable Diseases and Health Events of Public Health Concern Act”nga may kalambigitan sa Executive Order 79 sa Dakbayan sa Sugbo; ug simple resistance and disobedience to an agent of a person in authority.

Samtang sa Facebook post, ang UP Cebu admnistration mikondenar sa gibuhat sa kapulisan.

“After having reviewed video footages of the incident and documented accounts of witnesses of the protest against the proposed Anti-Terrorism Act last Friday, we strongly condemn the violent dispersal of the protest done by police forces, with many of their members in civilian clothing,” matod sa post. (KFD, REV)


Source: Sun.Star Superbalita (https://www.sunstar.com.ph/article/1859443/Superbalita-Cebu/Balita/Cebu-8-gibuhian-sa-kapulisan?ref=rss&format=simple&link=link)

No comments