Recent Posts

Breaking News

Bus, mga taxi nanagan na


Giklaro sa Land Transportation Franchising and Regulatory Board (LTFRB) 7 nga igo ra ang nanagan karon sa Metro Cebu nga mga sakyanang pampubliko aron masakyan sa publiko.

Samtang awhag ni LTFRB 7 Regional Director Eduardo Montealto Jr., ngadto sa local chief executives nga adto sa Inter-Agency Task Force moapelar hilabi na sa ilang mga hangyo nga padaganon na ang traditional jeepney.

Matod ni Montealto nga naa na sa 190 ka mga bus ug modern jeepney ang kasamtangan nga nanagan karon sa Metro Cebu.

Sa maong gidaghanon, anaa sa 72 ka modern jeep ang nanagan aron adunay masakyan kadtong mga sumasakay, hilabi na kadtong balik na ang trabaho atol sa general community quarantine.

Gibutyag usab ni Montealto nga anaa na sa 2,848 ka mga taxi na ang nagdagan sa Metro Cebu.

Niabot na sa 107 ka Transport Network Vehicle Service (TNVS) ang gitugotan na usab og dagan sukad nag-GCQ ang Sugbo hangtod sa Hunyo 7.

Gani gihulagway sa director nga base sa ilang na-monitor sa habagatang Sugbo, anaa sa 26 porsyento sa mga sumasakay gusto lang mosuroy samtang 80 porsyento sa pasahero sa amihanan, ganahan ra nga mosuroy sa Cebu City.

Kwarenta porsyento sa mananakay sa pampubliko nga sakyanan mga tinun-an.

Si Montealto, inubanan ang iyang ahensiya, nakamatikod sa Bulacao nga utlanan sa Cebu City ug Talisay City nga daghan ang pasahero tungod kay diha maghuwat ang mga sumasakay matag buntag.

Apan daw nabag-ohan pa ang mga pasahero niining mga bus nga nanagan tungod kay mobalik ra dayon hilabi na nga menos pa ang traffic karong GCQ.

Gani, naa sa 600 ka mga bus ang reserba sa LTFRB 7 gikan sa nagkadaiyang operator nga andam modagan sa kadalanan.

NISUBAY RA

Gipasabot usab ni Montealto nga kining ilang gihimo nisubay ra usab sila sa direkta sa ilang ulohang buhatan subay sa rekomendasyon sa Inter Agency Task Force on Emerging Infectious Diseases (IATF-EID).

Susama niining pagpadagan sa bus ug modern jeep nga maoy unang padaganon nga pampublikong sakyanan sigun sa gitawag nga “hierarchy of public transportation.”

Matod ni Montealto, di kini permanente ug nakasabot siya sa tumong sa mga mayor, apan ang panglawas ug kaluwasan sa pasahero ang priority karon nila.

Dunay mga local chief executive nga nanghangyo nga tugtan ang mga PUJ nga makabalik sa pagpamasahero, apan wa kini itugot tungod sa mga health protocol. / HBL


Source: Sun.Star Superbalita (https://www.sunstar.com.ph/article/1859707/Superbalita-Cebu/Balita/Bus-mga-taxi-nanagan-na?ref=rss&format=simple&link=link)

No comments