Recent Posts

Breaking News

BJMP-Davao duna nay kaso sa Covid-19


NAKATALA na ang Bureau of Jail Management and Penology (BJMP)-Davao og usa ka kaso sa coronavirus disease (Covid-19) human nga usa sa ilang personahe sa Lupon District Jail sa Davao Oriental nasusi nga positibo sa makamatay nga sakit.

Gisulti ni Jail Chief Superintendent Leo Pajo Baldon, director sa BJMP-Davao, pinaagi sa suwat pamahayag nga gipagawas niadtong Huwebes sa gabii, Hunyo 25, nga usa sa ilang jail guards nga nadestino sa Lupon District Jail nasusi nga positibo sa Sars-Cov-2, ang kagaw nga maoy hinungdan sa Covid-19.

Gihimo karon ang imbestigasyon aron nga madetermina kung paunsa natakdan ang personahe sa kagaw ug kon duna bay pagpasagad o wa pagsunod sa protocol.

Ang maong personahe naa na karon gipahimutang sa Mati Local Government Unit Isolation Facility.

Subay sa suwat-pamahayag nga niadtong Mayo 6, una siya nitambong sa trabaho, ang maong personahe uban sa iyang team gipailawom sa rapid tests apan tanan pulos negatibo.

Pagka Hunyo 1, nibalik ang personahe sa iyang balay sa Mati City human sa iyang 26 ka adlaw nga pagtrabaho ug nag-home quarantine ug gihatagan og instruksiyon sa iyang warden nga moreport sa iyang Local Barangay Health Unit aron nga mamonitor sa iyang home quarantine.

Niadtong Hunyo 15, nakompleto sa personahe ang iyang 14-day home quarantine ug nipailawom sa rapid diagnostic test uban sa upat pang BJMP personnel.

Gideklara ang lima ka personahe nga negatibo ug gihatagan og clearance sa Mati Incident Management Team nga mobalik og trabaho sa Lupon District Jail.

Niadtong Hunyo 18, tanang 14 ka incoming duty personnel ug 11 vulnerable persons deprived of liberty (PDL) sa Lupon District Jail gipailawom sa reverse transcription polymerase chain reaction (RT-PCR) swab test sa Provincial Government, apan ang nahisgutang personahe pakyas sa test samtang ang uban negatibo.

Nakasabot sa kapeligro sa PDLs, sukad Marso 20, nagpatuman ang BJMP og nationwide lockdown kon diin gipatuman ang istriktong "safety and security" protocols aron nga mapugngan ang pagkuyanap sa kagaw sulod sa pasilidad, nga naghatag og hulga ngadto sa PDLs tungod sa kaguot.

Sumala sa BJMP-Davao ang maong personahe nga nataptan sa kagaw gipailawom og confirmatory tests ug naghuwat sa mga resulta gikan sa City Health Office sa Mati. (Juliet C. Revita)


Source: Sun.Star Superbalita (https://www.sunstar.com.ph/article/1861535/Superbalita-Davao/Balita/BJMP-Davao-duna-nay-kaso-sa-Covid-19?ref=rss&format=simple&link=link)

No comments