Recent Posts

Breaking News

Bisan may 6 positibo sa Covid-19, tigbakay gipahimo


BISAN pa man nga aduna nay unom ka mga nagpositibo sa coronavirus disease 2019 (Covid-19), wala gihapoy kahadlok nga nagpahigayon og tigbakay ang mga lumolupyo sa Sitio San Jose 1, Barangay Labogon, Mandaue City.

Adunay nadawat nga impormasyon ang Superbalita Cebu, kabahin sa tigbakay sa maong sitio niadtong Dominggo, Hunyo 29, 2020 ug anaa pay uban sa mga nagtigbakay ang wala nag-mask.

Sa pakighinabi sa Superbalita Cebu ni Amado Manatad, ang kapitan sa Barangay Labogon, gikompirmar niya nga kada Dominggo, dili lang ang Sitio San Jose 1 apan lakip sab ang ubang mga sitio ang magpahigayon ug tigbakay sa ilang barangay.

Tungod niini, magsige sab og pahigayon og roving ang mga barangay tanod sa tanang Sitio aron pagsikop niining magtigbakay.

Gawas sa gibawal ang panagtapok ubos sa general community quarantine (GCQ) guidelines, apan ang pagtigbakay usa kini ka ilegal nga aktibidades, matod sa atong balaod.

Matod ni Manatad nga sa sige nila og raid sa mga sitio nga adunay mga nagtigbakay, wala pa silay nadakpan.

Tan-aw ni Manatad nga adunay mga lookout ang maong mga magtigbakay tungod inig abot sa ilang mga tanod sa lugar magdinaganay na ang mga tawo nga apil sa tigbakay ug wala na sila madakpan.

Sanglit kadaghan na kining nahitabo, si Manatd miingon sa Superbalita Cebu nga mangunay siya sa pagroving sa iyang barangay aron pag-edukar sa iyang lumupyo ang mga ginadili nga buhaton ubos sa GCQ labi na ang pagtapok tapok.

Kanunay niyang iingon ngadto sa mga lumulupyo nga mupatuo sa mga mando sa gobyerno aron dili matakdan sa maong sakit tungod dili lang kini mutakod sa usa ka tawo apan adunay posbilidad nga mataptan sab ang ilang pamilya.

Dugang ni Manatad nga nakigkoordinar na sila sa Basak Police Station aron pagsikop sa mga magtigbakay.

Sa laing bahin, miingon si PMaj. James Conaco, ang hepe sa Basak Police Station nga nakaalarma sila sa maong lugar niadtong Dominggo, Hunyo 28, 2020, apan pag-abot nila sa lugar nakasibat na kini.

Si Atty. John Eddu Ibanez miingon sab sa Superbalita Cebu nga pa-imbestigaran nila ang maong insidente gani nakigkoordinar na kini ni PCol. Jonathan Abella, ang city director sa Mandaue City Police Office. (KFD)


Source: Sun.Star Superbalita (https://www.sunstar.com.ph/article/1861886/Superbalita-Cebu/Balita/Bisan-may-6-positibo-sa-Covid-19-tigbakay-gipahimo?ref=rss&format=simple&link=link)

No comments