Recent Posts

Breaking News

Bike run gipahigayon sa Mandaue alang sa lanes


ISIP suporta sa pagpatuman sa bike lanes sa dakbayan sa Mandaue, si 6th District Congresswoman Emmarie “Lolypop” Ouano-Dizon nagpasiugda og bike run sa Sabado, Hunyo 13, 2020.

Giubanan siya nilang Provincial Board Member Jonkie Ouano, Consolacion Councilor Alfie Ouano, Mandaue City Councilor Anjong Ouano-Icalina, Looc Councilor Epoi Cabahug ug laing 25 ka mga biker.

Ang bike run paagi ni DIzon aron paghatag og suporta sa mga lakang sa local nga kagamhanan sa Mandaue aron pag-instalar og bike alang sa katawhan.

Ang pag-instalar sa bike lanes usa ka pagpatuman sa “new normal” nga nasinati sa dakbayan sa panahon sa epidemiya.

Gisugdan ang bike run alas 5:30 sa buntag gikan sa Barangay Opao, Mandaue City ngadto sa mga dalan nga adunay bike lanes sa dakbayan.

Sigon ni Dizon nga ang paggamit og bisikleta isip matang sa transportasyon samtang wa pa makadagan ang public transportation usa ka maayong inisyatiba sa dakbayan alang sa kalipukan ug kahimsog sa mga lumolupyo.

“Nakahatag siyag signal nga ang tanan importante ug gihatagan og pagtagad dili lang ang adunay sakyanan,” dugang ni Dizon. Matod sa sumbanan sa pagpatuman sa general community quarantine (GCQ), gitugotan ang mga kalihukan nga may kalabot kahimsog sa tawo sama sa pagbisikleta gikan alas 6 sa buntag hangtod alas 9 sa buntag.

Gisiguro sab ni Dizon nga ang tanang nga misalmot sa bike run nagsul-ob sa ilang face mask ug mituman sa social distancing protocol.

Giawhag sab ni Dizon ang ubang mga motorista nga morespeto sa gibutang nga mga bike lane ug ipagamit kini sa bikers.

Ang ubang mga local government unit (LGU) sa sixth district giawhag sab ni Dizon nga mosubay sa gipatuman sa dakbayan sa Mandaue ug magbutang sab og bike lanes sa ilang hurisdiksyon.

“We are one with our people and the Mandaue City Government in the advocacy for bicycle use,” sigon ni Dizon. (KFD uban sa PR)


Source: Sun.Star Superbalita (https://www.sunstar.com.ph/article/1860025/Superbalita-Cebu/Balita/Bike-run-gipahigayon-sa-Mandaue-alang-sa-lanes?ref=rss&format=simple&link=link)

No comments