Recent Posts

Breaking News

Bana ipa-barter


NAGPUNGASI nga nagpa-blotter sa Sta. Ana Police Station ang usa ka misis sa dihang gikulata sa iyang bana human siya nag-post sa Facebook nga ipa-barter ang mister sa laing lalaki nga makalingaw.

Sa impormasyon nga nahipos sa Superbalita gikan sa Sta. Ana police, nasayran nga nakulatahan ang misis nga si Anabelle (bansagon gitago), 34, nagpuyo sa Purok 3, Isla Verde, Barangay 23-C, Poblacion, Davao City.

Nasayran nga perteng sukoa sa bana dihang nag-post ang iyang asawa sa Facebook nga "ipa-barter nako ang akong bana, kay dili kabalo, dili molingaw, barter bana pod, kanang jolly ug dako'g gugma,” subay sa post sa misis.

Dihang mitug-an ang mga silingan didto sa bana ni Anabelle, hilabihang sukoa niini ug walay daghang istorya gikulata niya ang misis.

Nakahiagom og mga bun-og sa kalawasan ang misis hinungdan nga midangop sa kapulisan ug nagpa-blotter.

Gimandoan ang misis sa kapulisan sa Sta. Ana nga sa barangay sila mag-abot aron didto sila husayon.

Sa Biyernes, Hunyo 26, gikatakda nga mag-atubang sila sa barangay.


Source: Sun.Star Superbalita (https://www.sunstar.com.ph/article/1861396/Superbalita-Davao/Balita/Bana-ipa-barter?ref=rss&format=simple&link=link)

No comments