Recent Posts

Breaking News

Bagyong Butchoy, ikaduhang bagyo karong tuiga


MAGPADAYON nga makasinati og bati nga panahon ang Kabisay-an lakip ang Sugbo hangtod Biyernes, Hunyo 12, 2020 subay na usab sa tulo ka weather disturbance nga nakita sa Philippine Atmospheric, Geophysical and Astronomical Services Administration (Pagasa).

Usa niini ang Low Pressure Area (LPA) nga gipanglantawan nga mahimong Bagyong Butchoy, nga mao na unya kini ang ikaduhang bagyo sa nasod karong tuiga.

Matod ni Engr. Al Quiblat, officer-in-charge sa Pagasa Visayas, gawas sa maong bagyo, usa ning Intertropical Convergence Zone (ITCZ) ug ang southwesterly windflow o kining hangin nga nihuros sa habagatang kasadpan nga nakasinati ang Sugbo ug Kabisay-an og pag-uwan.

Si Quiblat nagkanayon nga atol sa ilang weather bulletin Miyerkules sa alas 10 sa buntag, Hunyo 10, nasigpatan ang LPA sa 30 kilometros amihang-silangan sa Borongan City, Easter Samar.

Labing naapektohan sa maong LPA ang maong dapit sa Sugbo diin gisaka kini sa Yellow Heavy Rainfall Warning Miyerkules, tungod sa kusog nga uwan sa maong dapit.

Pasaka ang maong LPA ug gikatakda nga mamahimo na kining bag-o sulod sa 48 oras diin anaa na kini sa Northern o sa Central Luzon.

Apan tungod sa trough sa maong bagyo, padayon nga makasinati og bating panahon ang Visayas hangtod Biyernes.

Matod ni Quiblat nga sa Sabado na makasinati og nindot nga panahon ang Sugbo.

Gipasabot usab niini nga kadtong mga kusog nga uwan nga masinati sa panahon sa gabii sa Sugbo, mga localized thunderstorms lang kadto ug pagpadayon pa kini nga masinati karon nga hapit na nga ideklarar ang panahon sa ting-uwan.

Gihuwat nalang nga maabot sa 25 millimeters sa uwan ang matala sa pito ka mga weather stations sa nasod nga anaa kini mahimutang sa kasadpan aron madeklarar na ang rainy season karong tuiga.

Gibutyag ni Quiblat nga kon dili kini karong semanaha, sunod semana na kini. (HBL)


Source: Sun.Star Superbalita (https://www.sunstar.com.ph/article/1859629/Superbalita-Cebu/Balita/Bagyong-Butchoy-ikaduhang-bagyo-karong-tuiga?ref=rss&format=simple&link=link)

No comments