Recent Posts

Breaking News

Bag-ong mga kaso, namatay sa Covid-19 miminos


BAG-ONG mga kaso sa coronavirus infection ingon man nangamatay ug naulian gikan sa coronavirus disease 2019 (Covid-19) niminos sa unang semana sa Hunyo kon itandi sa katapusang semana sa Mayo, base sa inadlaw nga case bulletin sa Department of Health (DOH).

Ang DOH nitala og kinatibuk-ang 3,809 nga natino nga mga infection gikan sa Hunyo 1 ngadto sa 7, 6 porsyento nga pagminos gikan sa 4,051 nga gitaho gikan sa Mayo 25 ngadto sa 31.

Ang nangamatay hapit sab mokatunga ang paggamay gikan sa 46 sa Hunyo 1 ngadto sa 7 gikan sa 89 gikan sa Mayo 25 ngadto sa 31. Ang average nga gidaghanon sa nangamatay matag adlaw nikatunga usab, unom na lang gikan sa 12 sa samang period nga gi-review.

Nihinay usab ang mga nangaulian og 6 porsyento ngadto sa 621 sa unang semana sa Hunyo gikan sa 660 sa katapusang semana sa Mayo. Ang inadlaw nga average miminos ngadto sa 88 gikan sa 94.

Base sa daily case bulletins sa DOH, moabot og 13, 407 ka bag-ong mga kaso ang natala gikan sa Mayo 1 ngadto sa Hunyo 7, 2020, nga naglangkob sa sobra sa katunga kun 60 porsyento sa kinatibuk-ang mga kaso sa infection sa nasod sukad sa Enero 2020.

Ang gidaghanon sa nangamatay mitabok sa 1,000, kay dunay dugang siyam nga nangamatay sa Hunyo 7 nga nihatod sa death toll ngadto sa 1,003.

Moabot ngadto sa 4,530 ka mga pasyente ang naulian, lakop nasa 89 nga gitaho sa Hunyo 7.

Sa Hunyo 6, ang DOH nitaho og 15, 905 ka aktibong mga kaso. Sagad kanila, o 15, 131 nitaho sa mild nga simtomas, 698 way simtomas, 57 ang grabe samtang 19 ang kritikal.

Sa tibuok kalibutan, ang Covid-19 nipatay og 397,388 ka mga ih dul-an sa 6.8 million ang infected sa Hunyo 7, 2020, matod World Health Organization (WHO). (MVI, Sunstar Philippines)


Source: Sun.Star Superbalita (https://www.sunstar.com.ph/article/1859422/Superbalita-Cebu/Balita/Bag-ong-mga-kaso-namatay-sa-Covid-19-miminos?ref=rss&format=simple&link=link)

No comments