Recent Posts

Breaking News

Asa ang mga manok?


ANG kontrobersyal nga mga manok nga gidonar sa pribadong kompaniya ngadto sa Kagamhanan sa Dakbayan sa Sugbo naapod-apod na ngadto sa mga sityo nga gi-lockdown niadtong Mayo 20-25, 2020.

Mao kini ang gibutyag ni Cebu City Councilor Eduardo Rama Jr., usa sa gitahasan sa pag-apod-apod sa mga manok.

Giklaro ni Rama nga dunay 16, 524 ka mga buhi nga manok ngadto sa Siyudad sa usa ka kompaniyang Thai.

Kini gibahinbahin sa south ug district barangays ug mga sityo nga naapektuhan og maayo sa coronavirus disease (Covid-19).

Mao usab kini ang sama nga kompanya nga nidonar og 20,000 ka buhi nga mga manok ngadto sa Association of Barangay Councils (ABC).

Gawas sa kompanyang Thai, ang distributor sa donor nga kompanya nidonar usab og 17, 450 ka buhi nga mga manok ngadto sa Siyudad

Human niini, ang distributor nidugang og donar og 9,730 ka inihaw nga mga manok, nga nagdala sa kinatibuk-ang donasyon ngadto sa 27,000.

Matod ni Rama nga sa wa pa giapod-apod ang mga manok ngadto sa mga pamilya, ang mga buhi gipang-ihaw una, gi-process ug gilimpyhan.

Si Rama niingon nga ang Siyudad nakahatag og 9,185 ka manok sa south district samtang 8,265 ngadto sa north district.

Ginganlan ni Rama ang mga dapit nga gipanghatagan sa mga manok gikan sa Mayo 20 ngadto sa Mayo 25: tag 1,000 ka manok sa matag Barangays Labangon, Punta Princess ug Basak Pardo; 1,650 sa Basak San Nicolas; 3,885 sa Mambaling; 500 sa Quiot; ug 150 ka buok sa drivers association.

Sa north district, 255 ka buok ang gihatag ngadto sa public utility jeepney drivers cooperative; 4,000 sa Barangay Kamputhaw; 1,305 sa Budlaan; ug 2,700 sa Lorega.

Si Rama niingon nga 9,730 ka inihaw nga manok gihatag ngadto sa Calamba depressed areas (1,305); 2,010 sa Sawang Calero; 2,000 sa Banilad; 500 sa Cogon Pardo ug Quiot Pardo frontliners; 705 sa Philippine National Police personnel nga namuyo sa Abellana Sports Complex; 1,605 sa Tinago; 605 sa Basak San Nicolas frontliners; ug 500 sa Alaska, Mambaling feeding program.

Matod ni Rama nga dunay pinanumpaang mga pamahayag nga gipirmahan sa barangay officials ug Mayor’s Information and Liaison Officers (Milo) dihang nidawat sila sa donasyon.

Gitataw ni Rama nga ang gidonar nga mga manok wa gipamaligya sa Milos.

“The same member came up with a serious and baseless insinuation, that the same chickens were allegedly sold by Milos. I believe this to be a malicious and irresponsible statement,” matod ni Rama.

“During these trying times, it is understandable for people to react and easily be misled by false accusations. As public officials, we have to be very responsible with what we say especially at a time like this. We should not take advantage of people’s vulnerabilities. Since this has already gotten out of hand, let us finally shed light on the truth,” dugang niya.

Si Councilor Joy Augustus Young, kinsa unang konsehal nga nangutana kalabot sa gidonar nga mga manok, niingon ga si Rama nanawag o nitubag kaniya dihang siya nihatag sa iyang privilege speech, kalabot sa mga manok niadtong Mayo.

Si Councilor Alvin Dizon nangutana usab kon nganong ang deed of donation naduso lang ngadto sa City Council sa Hunyo 24, atol sa regular session.

“My only question, ngano’ng karon pa ang deed of donation gipresentar sa konseho? Dapat andam na unta,” matod ni Dizon.

Si Rama nipasabot nga ang kompaniya unang nihatag kanila sa mga manok, sa wa pa sila mangayo sa mga opisyal sa Siyudad og deed of donation.

Si Rama nidugang nga wa siya makatubag sa pangutana ni Young niadtong Mayo kay wa siya makatambong sa session.

Maghuwat si Young sa dokumento nga ipadala sa iyang buhatan. (JJL)


Source: Sun.Star Superbalita (https://www.sunstar.com.ph/article/1861469/Superbalita-Cebu/Balita/Asa-ang-mga-manok?ref=rss&format=simple&link=link)

No comments