Recent Posts

Breaking News

96% sa senior citizens nakadawat na sa pension


ANG pag-apod-apod sa social pension sa mga senior citizen sa Central Visayas alang sa unang semester karong tuiga hapit na makompleto kay ang payout niabot na og 96 porsyento.

Si Regional Director Rebecca Geamala sa Department of Social Welfare and Development (DSWD 7), niingon nga sa kinatibuk-an, dunay 265,055 ka indigent senior citizens sa rehiyon nakadawat na sa ilang P3,000 nga social pension sa unang semester sa 2020 sa Huwebes, Hunyo 11.

Ang nahatag niabot na og P813,837,000 kun 95.76 porsyento sa kinatibuk-ang ighahatag, siya niingon.

Si Geamala niingon nga ang 11,233 nga nalistang indigent senior citizens mahimo moadto sa ilang tagsa ka local government units (LGU) aron pagkobra sa ilang tagsa ka pension.

Ang paghatag nagsugod niadtong Abril 22.

Ang social pension usa ka programa ubos sa Republic Act No. 9994 kun “Expanded Senior Citizens Act of 2010” nga naghatag og binuwan nga stipend nga P500 ngadto sa labing kabus nga senior citizens aron madugang sa ilang inadlaw nga panginahanglan, apil na ang medikal.

Kini ihatag sa semestral basis nga tag P3,000 matag semester kun matag unom ka mga buwan. (WBS uban sa PR)


Source: Sun.Star Superbalita (https://www.sunstar.com.ph/article/1860024/Superbalita-Cebu/Balita/96-sa-senior-citizens-nakadawat-na-sa-pension?ref=rss&format=simple&link=link)

No comments