Recent Posts

Breaking News

62 ka balay naa pa sa lockdown


BISAN kon gipahimutang na ang Mandaue City sa general community quarantine (GCQ), adunay kinatibuk-an nga 62 ka mga balay gikan sa lima ka mga barangay nga gipailawom gihapon sa lockdown.

Ang labing dako nga lockdown sa dakbayan kaniadtong Hunyo 5, 2020 naa sa Barangay Mantuyong nga adunay 57 ka mga balay.

Sa pakighinabi sa Superbalita Cebu ni Atty Si John Eddu Ibanez, executive secretary ni Mandaue City Mayor Jonas Cortes, siya nipasabot nga ang paglockdown sa lugar gikan sa rekomendasyon sa Emergency Operations Center (EOC) ug Inter-Agency Management Team (IMT) sa dakbayan.

Kon adunay magpositibo sa lugar, ipatuman ang 10 meter-radius lockdown gikan sa balay sa napositibo sa coronavirus disease (Covid-19) nga pasyente.

Ang nahitabo sa Barangay Mantuyong, sikitsikit ang balay hinungdan nga ubay-ubay ang na-lockdown sa dapit.

Ang pagsira sa sitio Zone 5 ug ubang parte sa Zone 6 sa Barangay Mantuyong nagsugod sa Mayo 6, 2020 hangtod karon, sukad nahibaw-an ang pasyente nga si MC93 nga namatay kaniadtong Mayo 3 positibo sa Covid-19. (KFD)


Source: Sun.Star Superbalita (https://www.sunstar.com.ph/article/1859209/Superbalita-Cebu/Balita/62-ka-balay-naa-pa-sa-lockdown?ref=rss&format=simple&link=link)

No comments