Recent Posts

Breaking News

6 Nagahanon naayo sa Covid-19


ANG Dakbayan sa Naga, Sugbo nakatala og unom ka naayo sa sakit nga coronavirus disease (Covid-19) ug usa ka bag-ong kaso Sabado, Hunyo 27, 2020.

Sa Facebook post sa City Government of Naga, Cebu, usa sa mga bag-ong naayo sa sakit naggikan sa Purok 3, Uling samtang ang lima naggikan sa Purok 3, Lower South, Tinaan.

Ang unom nga mga naayo adunay contact sa ikaunom nga kaso sa syudad nga si PN06, kinsa namatay na. Samtang ang ikadose nga pasyente (PN12) nga aduna usab contact ni PN06 nag-positibo gihapon sa virus.

Gibalita usab sa Vicente Sotto Memorial Medical Center nga si PN26, usa ka health worker nga na-admit sa maong ospital, naayo na usab sa maong sakit.

Samtang ang bag-ong kompirmadong kaso nga si PN41 usa ka 19-anyos nga babaye nga taga Purok Granada, Whiteland, Tuyan, City of Naga.

Matod sa Facebook post sa Naga, ang maong pasyente nagpuyo sa Dakbayan sa Talisay niadto pang buwan sa Mayo ug wala na mahibalik sa Naga.

Bagohay kining nanganak sa Talisay District Hospital niadtong Hunyo 25. Sa susamang adlaw, gikuhaan kini og swab test isip usa sa mga protocol sa ospital ug miresulta nga positibo sa Covid-19.

Sa gipahigayon nga contact tracing, ang mga ginikanan sa maong pasyente gikonsiderar nga mga close contact ug sugod Sabado sa gabii ipahimutang sila sa usa ka city-managed isolation facility sa Inoburan alang sa 14 ka adlaw nga mandatory quarantine.

Samtang ang lain unom ka miyembro sa pamilya ipaubos sa 14 ka adlaw nga home quarantine ug padayon nga i-monitor. (RSR)


Source: Sun.Star Superbalita (https://www.sunstar.com.ph/article/1861675/Superbalita-Cebu/Balita/6-Nagahanon-naayo-sa-Coronavirus-disease-2019?ref=rss&format=simple&link=link)

No comments