Recent Posts

Breaking News

50 ka seklitas giisyuhan og traffic citation tickets


SULOD sa duha ka semana nga gibutang ang bike lanes sa nag-unang mga karsada sa Dakbayan sa Mandaue, mokabat na ngadto sa 50 ka mga motorista ang mga na-isyuhan og traffic citation ticket (TCT) tungod sa pagsupak sa paggamit sa lanes.

Sa pakighinabi sa Superbalita Cebu kang Arnold Malig-on, chief of operations sa Traffic Enforcement Agency of Mandaue (Team), kini niingon ubay-ubay gihapon ang mga nangsupak sa saktong paggamit sa bike lanes sama sa pag-parking sa mga sakyanan sa bike lanes ug mga motorsiklo nga mosubay niini.

Tungod niini, gipangusgan sa Team ang pagbantay nila sa bike lanes aron sa pagbadlong sa mga mosupak sa paggamit ug aron sab sa pag-edukar sa mga motorista.

Mga pribado nga sakyanan ang kasagaran nga mag-parking sa bike lanes kay ang sakay adunay tuyo sa establisemento nga kilid lang sa dalan.

Niawhag si Malig-on ngadto sa mga establisemento, labi na niadtong anaa kilid sa dalan, nga magbutang og kaugalingong parking area aron di magpataka og park ang ilang mga kustomer.

Gani, ang mga mag-illegal parking sa bike lanes pamultahon og P1,000 kada citation alang sa four-wheeled drivers.

Bisan kon gianunsyo na sa Team nga ang bike lanes ekslusibo lang para sa mga bisikleta, apan aduna gihapoy mga magmotorsiklo nga mosubay.

Ang mga magmotor nga mosupak, makamulta og P500.

Sa laing bahin, giawhag sab ni Malig-on ang mga magbisikleta nga motuman sab sa balaod sa kadalanan.

Tungod kay anaa na sa 80 porsyento sa kadalanan sa Dakbayan sa Mandaue aduna nay bike lanes.

Sigon ni Malig-on nga kinahanglan sab nga gamiton kini sa mga magbisikleta ug dili moagi sa sidewalk.

Gipasabot ni Malig-on nga sama sa bike lanes nga eksklusibo alang sa mga bisikleta, ang sidewalk eksklusibo sab nga agianan sa mga tawo.

Giawhag sab niya ang mga magbisikleta nga mosunod sa direksyon sa dagan sa trapiko ug di mo-counterflow.

Sa traffic light, kinahanglan sab ang mga magbisikleta mohunong kon puwa o “stop” signal ang traffic light ug modungan og dagan sa ubang mga sakyanan sa panahon nga mo-green o “go” signal ang traffic light. (KFD)


Source: Sun.Star Superbalita (https://www.sunstar.com.ph/article/1861753/Superbalita-Cebu/Balita/50-ka-seklitas-giisyuhan-og-traffic-citation-tickets?ref=rss&format=simple&link=link)

No comments