Recent Posts

Breaking News

5 ka personnel sa Basilica gi-Covid


PABILING sirado gikan sa publiko ang Basicila Minore del Santo Niño human nakompimar nga lima sa personnel sa simbahan positibo sa coronavirus disease (Covid-19).

Si Padre Andres Rivera Jr., Prior Provincial sa Order of St. Augustine (OSA), nipahibawo nga sa 41 ka swab samples nga gikuha sa Cebu City Health Department, lima niini positibo sa Covid-19.

Way bisan usa sa lima pari.

Sa iyang text message sa Superbalita Cebu, si Fr. Aladdin P. Luzon, tigpamaba sa Basilica, niingon nga puro “personnel sila sa Basilica” ang positibo sa novel coronavirus.

Si Rivera niingon nga gipahigayon niadtong Mayo 29, 2020 ang polymerise chain reaction (PCR) sa kombento sa Basilica ug sa Hunyo 2 sa Barangay Tinago health center.

“It must be noted that since the detection of a ‘suspected’ Covid-19 case last May 25 at the Basilica convent, all persons were already observing the strict protocol to prevent the contagion within the convent,” matod ni Rivera sa iyang pahibawo nga gibutang sa Facebook page sa Basilica.

Gawas nga sila mag-disinfect, matod ni Rivera ila pang palig-unon og maayo ang “safety procedures and protocol” una pa sila mobukas alang sa publiko.

Si Rivera niingon nga ang lima ka mga personnel nagpabiling asymptomatic ug naa na sa ika 13 nga adlaw sukad sila gi-quarantine. Usa ka kasaligang tinubdan nga di gustong nganlan niingon nga usa ka kusinero nga tigkompra sa merkado ang nipakita og pasiunang mga timailhan sa Covid-19.

Wa mokompirmar si Luzon dihang giteksan sa Superbalita Cebu kalabot niini.

Kay sirado pa ang simbahan, ilang giawhag ang mga magtutuo nga moapil sa mga online mass nga giagi sa Facebook live sa ilang page sa social media.

Kapin sa tulo ka mga buwan nga wa na magmisa ang mga simbahang Katoliko sukad gisugdan pagpatuman sa kagamhanan ang mga quarantine protocol aron paglikay sa pagkatap sa Covid.

Hunyo 1, gilugakan sa Inter Agency Task Force for the Management of Infectious Diseases (IATF-MID) ang enhanced community quarantine (ECQ) ngadto sa general community quarantine (GCQ) sa Dakbayan sa Sugbo.

Ubos sa GCQ, makabukas na ang mga simbahan ug makapatambong na og manimbahay nga di mosobra sa 10 ka tawo matag misa.

Lahi sa Lalawigan sa Sugbo kay si Gobernador Gwendolyn Garcia nimando na sa pagbukas sa tanang mga simbahan ug patambungan og katunga sa kapasidad ang matag misa.

Estriktong gituman sa Archdiocese of Cebu ang mga health protocol nga gimando sa kagamhanan sama sa physical distancing ug kanunay nga pagsul-ob og mask. Ang di magsul-ob og mask, di makasulod sa simbahan. (REV)


Source: Sun.Star Superbalita (https://www.sunstar.com.ph/article/1859444/Superbalita-Cebu/Balita/5-ka-personnel-sa-Basilica-gi-Covid?ref=rss&format=simple&link=link)

No comments