Recent Posts

Breaking News

40 balay gilarot sa buhawi


TACURONG CITY -- Gikuso-kuso sa buhawi ang 40 ka balay alas 5:30 sa hapon niadtong adlaw nga Dominggo sa Sultan Kudarat.

Sa taho gikan sa Municipal Disaster Risk Reduction and Management Office (MDRRMO) sa President Quirino nga nakasinati sila og makusog nga ulan lakip na hangin.

Taud-taud lang ang milabay nasaksihan sa mga molupyo sa Barangay Romualdez ug Kalanawi II sa President Quirino ang nagtuyok nga hangin o buhawi paingon sa ilang mga balay.

Nanagan ang mga sibilyan pagawas sa ilang gipuy-an paingon sa luwas nga dapit ug nagtago.

Nakit-an mismo ni Dominador Canduji nga gikuso-kuso sa buhawi ang iyang balay apil na sa ilang mga silingan.

Nangatumba sab ang punuan sa saging, lubi, kahoy ug mga prutas nga giigo sa daw bagyo nga hangin.

Suwerte nga walay naangol sa pag-igo sa buhawi sa duha ka barangay sa President Quirino apan gibati sila og sobrang kahadlok.

Sa kasamtangan, giplastar na sa LGU-President Quirino ang pang-apud-apod og hinabang sa mga pamilya nga giigo sa buhawi. (Edgar Fuerzas)


Source: Sun.Star Superbalita (https://www.sunstar.com.ph/article/1859378/Superbalita-Davao/Balita/40-balay-gilarot-sa-buhawi?ref=rss&format=simple&link=link)

No comments