Recent Posts

Breaking News

40 anyos nga panday gipusil, kritikal; 73 anyos nga lola napagan


Kritikal ang kahimtang sa usa ka 40 anyos nga panday, kinsa gipusil sa gawas sa iyang balay sa sudlunong bahin sa Block 8, dan Magsaysay, Barangay Suba, dakbayan sa Sugbo niadtong Hunyo 3, pasado alas 3:00 sa kaadlawon.

Si PMaj. Winston Peñaranda, officer-in-charge sa San Nicolas Police Station 6, niila sa panday nga si Eugene Salmago, nag-abang sa maong dapit.

Samtang napagan usab ang usa ka 73 anyos nga lola, kinsa silingan ni Salmago. Ang tiguwang nakaangkon og samad sa iyang likod ug luwas na ang kahimtang.

Matod ni Peñaranda, sa ilang imbestigasyon nga si Salmago gikan sa ikaduhang andana nga bahin sa iyang balay ug nanaug sa ubos diin ang tiguwang nga niadtong tungora nangandam sa iyang baligya nga painit.

Matod ni Peñaranda, nag-istoryahanay ang tiguwang ug si Salmago nga kalit lang nakadungog sila ug lanog sa buto sa wala matino nga armas ug taud-taud nahagba si Salmago.

Igo sa ulo si Salmago ug gidala sa tambalanan sa mga silingan. Unang gitutokan sa imbestigasyon sa San Nicolas Police Station ang posibleng motibo nga bangi personal.

Wala usab mailhi ang tawo nga nagpusil ni Salmago, matod sa kapulisan. / BBT


Source: Sun.Star Superbalita (https://www.sunstar.com.ph/article/1858987/Superbalita-Cebu/Balita/40-anyos-nga-panday-gipusil-kritikal-73-anyos-nga-lola-napagan?ref=rss&format=simple&link=link)

No comments