Recent Posts

Breaking News

37 ka pulis sa Sawang Calero balik trabaho na


ANG 37 ka mga pulis sa Sawang Calero Police Station sa Cebu City Police Office (CCPO) balik na sa trabaho human gi-isolate sulod sa 35 ka adlaw.

Gibuksan na usab niadtong Martes, Hunyo 2, 2020 ang police station alang sa publiko.

Kini ang gipahibawo ni Police Major Eduard Sanchez, hepe sa Sawang Calero Police Station, human sila gitugtan sa Regional Health Services (RHS) nga makabalik na sa ilang trabaho.

Matod ni Sanchez nga nagsugod sila pagbalik sa ilang trabaho niadtong Martes.

Gidugang ni Sanchez nga ang laing 14 sa 16 niya ka mga sakop nga nagpositibo sa coronavirus disease (Covid-19) hayan sa sunod semana makabalik sa ilang trabaho.

Ang mao nga police station gi-lockdown human ang ilang duha ka mga dinakpan nga durugista nagpositibo sa Covid-19.

Sa polymerase chain reaction (swab) tests sa mga pulis, napalgan nga ang tanang nag-duty sa police station positibo usab sa mao nga sakit.

Samtang 14 ka mga pulis sa Labangon Police Station gibalhin sa Cebu City Resource Management and Development Center (Cremdec) sa bukirang barangay sa Taptap.

Ang usa nga ika 15 naa sa barangay isolation center (BIC) samtang ang usa gidala sa ospital human misaka ang blood pressure.

Gipaabot nga ang 14 ka mga pulis mo-duty na og balik sa sunod semana.

Sagad sa mga pulis nga nangasakit og Covid-19 nangatakdan sa ilang dinakpang mga durugista. (BBT)


Source: Sun.Star Superbalita (https://www.sunstar.com.ph/article/1859978/Superbalita-Cebu/Balita/37-ka-pulis-sa-Sawang-Calero-balik-trabaho-na?ref=rss&format=simple&link=link)

No comments