Recent Posts

Breaking News

35 anyos nga mananagat nalumos sa kadagatan sa lungsod sa Alegria


PATAY nang napalgan ang usa ka mananagat sa lungsod sa Alegria, lalawigan sa Sugbo niadtong Dominggo sa gabii, Hunyo 7.

Si PMSgt. Joselito Perellano sa Alegria Police Station nga nahinabi sa Superbalita Cebu niila sa biktima nga si Erick Lobiano, 35, molupyo sa Sityo Minag-a, Barangay Legaspi, Alegria.

Dugang ni Perellano nga nahitabo ang insidente didto sa lawod nga bahin sa kadagatan sa Barangay Centro sa lungsod sa Alegria.

Sa inisyal nga imbestigasyon sa kapulisan, gidudahan nga ang hinungdan sa pagkalumos ni Lobiano tungod sa pagbuto sa makina niini sa iyang pumpboat nga miresulta sa pagkalabay sa dagat ug nalumos.

Ang lawas ni Lobiano nabangatan sa laing mananagat sa dapit. Padayon pa ang imbestigasyon sa kapulisan sa maong lungsod kalabot sa insidente. Lakip sa ilang gisusi kon wala foul play sa kamatayon sa mananagat sa lawod sa Alegria. (BBT)


Source: Sun.Star Superbalita (https://www.sunstar.com.ph/article/1859425/Superbalita-Cebu/Balita/35-anyos-nga-mananagat-nalumos-sa-kadagatan-sa-lungsod-sa-Alegria?ref=rss&format=simple&link=link)

No comments