Recent Posts

Breaking News

178K QR code pass iapod-apod na


ANG Cebu City Government mihatag na sa 178,000 ka quarantine pass (Q-pass) nga adunay QR code ngadto sa mga barangay isip hulip sa 250,000 ka passes nga gipakanselar sa Department of the Interior and Local Government (DILG).

Si Mayor Edgardo Labella nagkanayon nga ang gidaghanon sa Q-pass nga gihatag ngadto sa mga barangay kapitan maoy nasabutan uban sa Department of Health 7 (DOH) 7.

Ang 80 ka mga barangay kapitan gipatawag ni Labella uban sa Cebu Task Force on Covid-19 niadtong Huwebes, Hunyo 25.

Sila gipangayoan og numero sa gidaghanon sa mga balay sa matag jurisdiction.

Atol sa meeting, didto sila si Environment Secretary Roy Cimatu ug retired Major General Melquiades Feliciano, Visayas deputy chief implementer. Sila gitahasan ni Presidente Rodrigo Duterte sa pagtabang sa Cebu City sa pagpaminos sa pagpanakod sa Covid-19.

Ang Cebu City maoy dunay labing taas og mga kaso sa pagpanakod sa tibuok nasod.

Ang Q-pass adunay QR code para dili makopya ni bisan kinsa.

Personal kining gipahatod ni Labella ngadto sa tagsa-tagsa ka barangay hall kagahapon sa hapon, Hunyo 26, para maapod-apod usab sa mga barangay official ngadto sa ilang mga lumolupyo sa labing dali nga panahon.

KINSAY MAKAGAWAS?

Matag pass dunay mga numero. Ang katapusang numero maoy basehan kon unsa nga adlaw mahimong makagawas ang representante sa usa ka panimalay.

Ang odd numbers sama sa 1-3-5-9 makagawas sa Lunes, Martes ug Biyernes samtang ang even numbers sama sa 0-2-4-6-8 makagawas sa Martes, Huwebes ug Sabado.

Ang paggawas gikan alas 6 sa buntag hangtod alas 8 sa gabii.

Sa Dominggo ,way gitugotan nga makagamit sa Q-pass base sa nasabotan sa 80 ka mga barangay kapitan nga giaprobahan sa task force.

Si PRO-7 Chief Brigadier General Albert Ignatius Ferro nihangyo sa katawhan nga mag-antos lang og gamay samtang anaa pa ang pandemic sanglit ang gibuhat sa gobyerno para sa kaayohan sa 1.1 milyones ka mga tawo sa Siyudad.

Matod niya nga kon mawagtang ang Covid-19, mapahimuslan sa tanan ang maayong epekto. (PAC)


Source: Sun.Star Superbalita (https://www.sunstar.com.ph/article/1861554/Superbalita-Cebu/Balita/178K-QR-code-pass-iapod-apod-na?ref=rss&format=simple&link=link)

No comments