Recent Posts

Breaking News

17 anyos gipaundang pag ‘Tiktok’, naghikog


BISAN unsa nga buhat, basta palab-anan, mosangko sa di maayo nga hitabo.

Sama sa Tiktok nga gikalingawan sa kadaghanan, bata man o hamtong, panahon ning quarantine diin kadaghanan naa lang sa balay.

Ang Tiktok maoy gigamit nga kalingawan pagpalabay sa kalaay sud sa balay.

Apan niay 17 anyos nga lalakeng “naungo” na sa Tiktok kay makaadlawnan na, naghikog kay nahiubos nga gibadlong.

Patay nang nakaplagan sa iyang pamilya si Adrian Ared Villahermosa, tinun-an sa grade 11 sa Huwebes sa alas 12:30 kaadlawon, Hunyo 4, 2020 nga nagbitay sa hagdanan sa ilang balay sa Deca Homes subdivision, Barangay Tungkil, lungsod sa Minglanilla.

Si Major William Homoc, hepe sa Minglanilla Police Station nga nahinabi sa Superbalita Cebu, nagkanayon nga gikasab-an si Villahermosa sa iyang maguwang babaye kay lawom na kaayo ang kagabhion, nagsige pa gihapon og "Tiktok."

Gawas nga nakasab-an sa pag "Tiktok," nahiubos sab kini dihang wa pausla sa laptop sa maguwang.

Nagkuha kini og pisi ug gihigot sa ilawom sa hagdanan.

"Murag maingon ta nga grabe na kaayo iyang pagka-ungo sa Tiktok kay nagsige na lang daw maabtan kaadlawon. Mao nga nakasab-an, natambagan," dugang ni Homoc.

Matod pa ni Homoc, nga wa silay nakitang dunay foul play sa kamatayon sa teenager. (GPL)


Source: Sun.Star Superbalita (https://www.sunstar.com.ph/article/1859009/Superbalita-Cebu/Balita/17-anyos-gipaundang-pag-Tiktok-naghikog?ref=rss&format=simple&link=link)

No comments