Recent Posts

Breaking News

1,000 kapin ka trabaho para sa taga Mandaue


ADUNAY kapin sa 1,000 ka mga trabaho ang gitanyag sa Public Employment Services Office (Peso) sa Dakbayan sa Mandaue alang sa mga Mandauehanon.

Matod ni Musoline Suliva, pangu sa Peso, bisan ang siyudad gipaubos sa general community quarantine (GCQ), aduna gihapoy mga industriya nga nagbukas sa ilang mga pultahan alang sa mga bag-ong kawani.

Miingon si Suliva sa Superbalita Cebu nga ang Vallacar Transit Inc. nangita og sobra sa 300 ka bus drivers ug bus konduktor.

Giingon niya nga prayoridad nilang dawaton ang mga jeepney drivers sa Mandaue City nga wala na makabiyahe sukad sa lockdown sa Covid-19.

Pipila sab ka mga supermarket, industriya sa produksiyon ug ahensya sa konstruksyon adunay mga abli nga trabaho alang sa mga Mandauehanon. Gipasabot ni Suliva nga bisan kinsa ang mamahimong maka-apply sa mga abli nga trabaho nga igo sa kwalipikasyon sa matag aplikante.

Adunay usab sila mga oportunidad sa trabaho alang sa mga nars, mga opisyal sa accounting, kawani sa opisina ug uban pa.

Giawhag niya ang mga interesado nga magbisita sa ilang opisina nga nahimutang sa ikatulo nga andana sa Mandaue City Cultural and Sports Complex.

Ang mga aplikante mahimong magdala sa ilang mga bio-data ug magpadayon sa ilang opisina.

Nagsunod gihapon silang Suliva sa social distancing ug pagsul-ob sa face mask kon adunay mga aplikante nga miduaw sa ilang opisina.

Dugang pa niya nga mas maayo nga moadto ang mga aplikante sa ilang opisina aron ang mga aplikante makaagi sa pasiuna nga interbyu ug employment training sa dili pa sila paadtuon sa kompanya.

Ang employment training mobansay sa mga aplikante ug mopahibawo sa mga aplikante sa mga angay nga buhaton sa panahon nga paadtuon na sila sa kompanya alang sa interbyu.

Sigon ni Suliva nga aduna ra silay contact sa mga industriya nga adunay job opportunites ug sila na ang mo-endurso sa mga aplikante ngadto sa mga kompanya. (KFD)


Source: Sun.Star Superbalita (https://www.sunstar.com.ph/article/1859301/Superbalita-Cebu/Balita/1000-kapin-ka-trabaho-para-sa-taga-Mandaue?ref=rss&format=simple&link=link)

No comments