Recent Posts

Breaking News

1 patay, 3 angol sa mga aksidente


USA ang patay samtang tulo ang nangaangol sa tulo ka managlahi nga mga disgrasya sa kadalanan sa managlahi nga mga dapit.

Unang disgrasya sa lungsod sa Ronda pasado alas 5 sa Biyernes, Hunyo 12, 2020, diin usa ang patay ug usa ang angol.

Si Police Master Sergeant Alvin Enad sa Ronda Police Station, niila sa namatay nga si Beltran Israel, hingkod, Spanish national, kasamtangang nagpuyo sa lungsod sa Moalboal. Siya maoy drayber sa motorsiklo.

Samtang naangol si Velmer Delos Reyes, hingkod, taga Barangay Canduling, sa mao nga lungsod.

Sa imbestigasyon sa Ronda Police Station nasayran nga si Israel gikan sa lungsod sa Barili pauli na unta sa lungsod sa Moalboal.

Apan paghiabot sa nasudnong dalan sa Barangay Canduling, nibangga kini sa traysikol nga niliko pawala paingon sa gasolinahan.

Giingong kusog ang dagan ni Israel nga niresulta sa pagkalagpot atol sa impact.

Dali siyang gidali sa Barili District Hospital, apan gideklarar nga dead on arrival.

Samtang si Delos Reyes na- hospital arrest sa Vicente Sotto Memorial Medical Center human gidala usab tungod sa pagkaangol.

Si Delos Reyes posibleng mag-atubang og kaso nga reckless imprudence resulting to homicide.

CORDOVA

Usa usab ang naangol sa pagkabangga sa dalaga sa Barangay Dapitan, lungsod sa Cordova ug naospital.

Si Police Lieutenant Jan Ace Layug, hepe sa Cordova Police Station, niila sa biktima nga si Jessa Manatad, 28, dalaga, drayber sa Yamaha Mio Soul.

Matod ni Layug nga si Manatad sakay sa iyang motorsiklo mga alas 12:50 sa Sabado sa kaadlawon paingon na unta mopauli sa ilang balay.

Siya gikan nibisita sa iyang higala, giingong kalit nga nibangga sa gibabag nga puthaw sa checkpoint sa lungsod.

Si Manatad nakaangkon og pangos sa iyang kalawasan ug naospital.

Imbestigahon sa Cordova Police Station kon nganong nauli si Manatad kaadlawon na sa Sabado bisan dunay curfew sa tibuok lalawigan sa Sugbo.

Samtang usa ka lolo nga nagmotorsiklo nabangga kilid sa nasudnong dalan sa Barangay Lower Beserel, lungsod sa Boljoon, alas 8 sa buntag sa Sabado, Hunyo 13.

Si Patrolman Nitchell Carbo niila sa biktima nga si Gualberto Miranon, 64, taga Barangay Talisay, lungsod sa Santander

Matod ni Carbo nga si Miranon sakay sa iyang motorsiklo samtang nagsubay sa dalan paingon unta sa lungsod sa Dalaguete.

Pag abot na sa nahisgutang barangay sa lungsod Boljoon, nawad-an kini sa iyang kontrol sa pagmaneho ug mi kaliring kilid sa dalan ug nabangga.

Si Miranon gidala sa Oslob Municipal Health Center tungod sa mga pangos sa lawas. (BBT)


Source: Sun.Star Superbalita (https://www.sunstar.com.ph/article/1860027/Superbalita-Cebu/Balita/1-patay-3-angol-sa-mga-aksidente?ref=rss&format=simple&link=link)

No comments