Recent Posts

Breaking News

Visayan Electric mamutol nag balik


KARON nga aduna na'y dapit sa Sugbo nga gipaubos sa general community quarantine (GCQ), mamutol na usab og balik ang Visayan Electric sugod Hunyo 1 sa mga dapit nga gipaubos na sa GCQ.

Kini alang sa mga accounts nga nag-due na sa wala pa ang Marso 15 o kadtong nga wala kabayad sa ilahang bill sa kuryente sa buwan sa Enero ug Pebrero.

Apan giklaro sa Visayas Electric nga kadtong bill nga nag-due sulod sa enhanced community quarantine (ECQ) o gikan Marso 15 hangtod Mayo 15, dili ra sila putlan apan ipaagi og installment ang bayad sulod sa upat ka buwan.

"But ang bill nga due during ECQ, from March 15 to May 15, dili ra putlan bisan wala makabayad. Ipa-installment na nga 4 months to pay ang total bills sa ECQ. Magsugod bayad sa unang installment karon June. Unya ma reflect na na ang installment sa bill nga madawat nila this month," kini matod sa tigpamaba sa Visayan Electric nga si Quennie Sanchez Bronce.

Hinuon gitambagan ang kostumer sa Visayan Electric nga kon mamahimo magpabilin kini sa panimalay ug himuon nalang ang pagpangutana sa ilang bills sa Facebook Page niini nga Visayas Electric o sa customer service hotline nga 230-8326.

Mamahimo usab ma-download ang bill sa "MobileAP," ang mobile application sa Visayan Electric ug uban distribution utilities ubos sa AboitizPower.

Samtang subay niining GCQ sa lalawigan sa Sugbo, gipahibawo sa Visayan Electric nga balik operasyon na usab sila sa mga dapit sa GCQ sugod Mayo 20.

“Visayan Electric has made preparations to incorporate the new normal in its operations to protect its employees and its customers and to ensure continued service to the public,” matod ni Engr. Raul C. Lucero, President ug Chief Operating Officer sa Visayan Electric.

Ang maong distribution utility mopatuman og estrikto nga re-entry protocol alang sa mga kawani niini ug sa contractors.

Nalakip sa full operations na ang buhatan nila sa Glajj Building sa Lamac, Consolacion diin gidumala sa contractor niini.

Apan ang buhatan niini sa Dakbayan sa Sugbo, Mandaue, ug Talisay lakip na ang buhatan niini sa J.Panis Street sa Banilad, pabilin nga skeleton ang workforce niini. (HBL)


Source: Sun.Star Superbalita (https://www.sunstar.com.ph/article/1857212/Superbalita-Cebu/Balita/Visayan-Electric-mamutol-nag-balik?ref=rss&format=simple&link=link)

No comments