Recent Posts

Breaking News

Tapok sa Eid'l Fitr gimortar; 2 bata patay, 14 naangol


COTABATO CITY -- Nagbangotan karon ang pamilya sa duha ka bata nga napatay sa pagbusikad sa bala sa mortar alas 4:25 sa hapon, Mayo 24, sa probinsya sa Maguindanao.

Naila ang mga napatay nga sila Aslamiah Tambak, 10 anyos, ug igsoon niya nga si Sadam Tambak, 7 anyos.

Naangol sab sila Noraisa Tambak, 40 anyos, inahan sa duha ka bata nga napatay; Norsaid Tambak, 5 anyos; Badria Ebus, 35; Saud Ebus, 7; Aida Kembeg, 35; Tata Kembeg, 30; Najima Pua, (PWD) 16; Jepu Pua, 15 anyos; Muslima Tambak, 40; Mati Ali, 45; Mia Elian 20; Salonga Marcos, 20; ug si Halid Dagedeban, 21 anyos, mga molupyo sa Barangay Kitango, Datu Saudi Ampatuan, Maguindanao.

Gibutyag ni Datu Saudi Ampatuan Municipal Administrator Musib Tan nga samtang nagdula-dula ang mga bata dungan sa Eid'l Fitr kalit lang mibusikad ang bala sa 81 mm mortar nga miigo sa balay sa pamilya Tambak.

Tungod sa kakusog sa pagbusikad sa eksplosibo duha ka bata ang nabugtuan sa kinabuhi ug 14 ang naangol.

Ang mga samaron ang gisapupo sa ilang pamilya ug gidala dayon sa Maguindanao Provincial Hospital.

Gidugang ni Municipal Administrator Musib Tan nga bag-o ang pagbusikad sa eksplosibo miigo sa atop sa balay sa pamilya Tambak diin nasiplatan sa mga sibilyan ang mga miyembro sa Bangsamoro Islamic Freedom Fighters sa Barangay Elian duol lamang sa Barangay Kitango.

Hustisya karon ang singgit sa pamilya sa mga biktima ug naghangyo kini kang Presidente Rodrigo Duterte sa hugtanon nga imbestigasyon sa hitabo.

Sa kasamtangan, ang kapulisan sa Datu Saudi Ampatuan Municipal Police Station ang padayon nga nag-imbestiga labot sa hitabo. (Edgar Fuerzas)


Source: Sun.Star Superbalita (https://www.sunstar.com.ph/article/1857675/Superbalita-Davao/Balita/Tapok-sa-Eidl-Fitr-gimortar-2-bata-patay-14-naangol?ref=rss&format=simple&link=link)

No comments