Recent Posts

Breaking News

Tag 50K nga bugas, delata ihatag sa taga Alaska


ANG Mambaling mao ang dunay labing taas og mga kaso sa coronavirus disease (Covid-19) sa Dakbayan sa Sugbo.

Hapit katunga sa mga kaso sa Covid-19 sa Dakbayan sa Sugbo nagagikan sa mao nga barangay.

Ilang gilabwan ang Cebu City Jail nga mao unta ang dunay labing daghan og mga kaso sa dakbayan.

Nisaka na ngadto sa 539 ka mga kaso sa Covid-19 sa Barangay Mambaling, partikular sa sityo Alaska nga gipaubos na sa lockdown niadtong Miyerkules

Kini human nakadiskobre og laing 106 ka positibo sa Covid ang City Health Department (CHD) niadtong Mayo 6.

Duna say laing tagsa ka kaso sa Barangay Tejero ug Suba sa Cebu City nga maoy nihatod sa tanang mga kaso niadtong Miyerkules ngadto sa 108.

Sa tibuok Cebu City, nisaka na ngadto sa 1,388 ka mga Covid-19 cases, pito ang nangamatay.

Hinabang

Human sa lockdown, si Mayor Edgardo Labella, pinaagi ni City Administrator Floro Casas Jr., gipadad-an og 1,000 ka sako tag 50 kilos nga bugas ug 20,000 ka lata nga corned beef ug beef loaf ang mga taga sityo Alaska.

Si Casas nagkanayon nga dugangan pa sa City Government ang ayuda nga ilang gihatag ngadto sa Mambaling sa mosunod nga mga adlaw gumikan usab sa kadaghan sa mga molupyo sa maong dapit.

Nagsunod sa Mambaling nga adunay labing daghan og kaso mao ang City Jail nga sakop sa Barangay Kalunasan, 332; Barangay Luz, 193; Labangon, 125; ug Carreta 12.

Si Konsehal Joel Garganera nagkanayon nga di angay mabalaka sanglit ang Cebu City adunay mga Barangay Isolation Center (BIC) diin ibalhin ang asymptomatic patients sulod sa 14 ka adlaw.

Sa kinatibuk-an, ang mga BIC sa siyudad maka-accomodate og 1,800 ka mga pasyente.

Kadtong Covid-19 positive nga adunay mild ug moderate nga sintomas maoy ibalhin ngadto sa mga quarantine facility nga nahimutang sa Bayanihan Center ug sa Cebu City Quarantine Center nga makaatiman og 200 ka mga pasyente.

Jail Guards

Pito ka jail guards nga gikan sa Cebu Provincial Detention and Rehabilitation Center (CPDRC) nagpositibo sa Covid-19.

Kini maoy gipahibaw ni Gobernador Gwendolyn Garcia atol sa press conference sa Kapitolyo sa Mayo 6, 2020.

Ang maong mga guard gi-isolate na sa pasilidad.

Sukad sa pagtumaw sa Covid-19, ang mga personnel sa CPDRC gidid-an una sa pag-uli sa ilang tagsa ka balay.

Apan sa gihapon, dunay 18 ka tawo sa pasilidad nga positibo sa Covid.

Way natala nga bag-ong positibong kaso sa lalawigan sa Miyerkules.

Apan padayon ang Monitoring sa lalawigan sa 3,336 ka mga Persons Under Monitoring (PUM) ug 46 nga nakasinati og indfluenza like illnesses (ILI).

Natala ang 71,712 ka mga Sugboanon nga naka kompleto na sa 14 ka adlaw nga quarantine.

Sa kinatibuk-an may 35 na ka mga positibong kaso ang Probinsya sa Sugbo. (PAC, ANV)


Source: Sun.Star Superbalita (https://www.sunstar.com.ph/article/1855511/Superbalita-Cebu/Balita/Tag-50K-nga-bugas-delata-ihatag-sa-taga-Alaska?ref=rss&format=simple&link=link)

No comments