Recent Posts

Breaking News

Selpon natagak pag Tiktok; gikasab-an, 15-anyos naghikog


WA MAGDAHOM ang mga ginikanan nga ang makalingaw nga Tiktok maghatod sa ilang kagul-anan human ilang anak nagpakamatay niadtong Huwebes, Mayo 21, 2020 sa Sitio Kampar, Purok 3, Brgy. Licos, Dakbayan sa Danao.

Si Ralph Vince Roble, 15, dead-on-arrival (DOA) sa tambalanan sa Dakbayan sa Danao.

Si Police Corporal Mark Anthony Manulat, imbestigador sa Danao Police Station nga nahinabi sa Superbalita Cebu, nagkanayon sa wa pa nagpakamatay, gikatahong si Ralph nakasab-an sa iyang maguwang babaye.

Kini tungod kay gikuha ni Ralph ang selpon nga wa mananghid, natagak ug nabuak samtang nag-Tiktok.

Si Ralph giingong hilom nga nikuha sa selpon sa iyang ate sanglit mahilig kini sa social media ingon man sa pag-communicate sa iyang mga barkada.

Gikatahong mahilig sab kini nga mag-Tiktok samtang nagpadayon ang quarantine tungod sa coronavirus disease 2019 (Covid-19).

Matod pa ni Manulat nga si Timoteo, amahan ni Ralph, maoy ni-report sa kapulisan kabahin sa insidente.

Tungod sa kalagot sa maguwang sa pagkabuak sa selpon, gikasab-an og maayo ang manghod.

"Uso naman gud ni nalingaw sa pag-Tiktok unya aksidenting natagak ang selpon, naguba," dugang ni Manulat.

Wa nahimutang si Ralph kay gawas nga wa niya mahuman ang pag-Tiktok, nahadlok kini sa iyang maguwang.

Ang amahan nibutyag nga human nakasab-an si Ralph sayo sa buntag, kalit lang nahanaw.

Nakugang na lang sila nga mga alas 11 sa buntag, didto kini sa abandunado nga balay sa ilang silingan nagbitay na, naghikot og bakus sa iyang liog.

Daling gidala sa iyang kabanay ug silingan si Ralph sa tambalanan, apan patay nang niabot.

Si Manulat nibutyag nga way foul play ang kamatayon ni Ralph. (GPL)


Source: Sun.Star Superbalita (https://www.sunstar.com.ph/article/1857317/Superbalita-Cebu/Balita/Selpon-natagak-pag-Tiktok-gikasab-an-15-anyos-naghikog?ref=rss&format=simple&link=link)

No comments