Recent Posts

Breaking News

Pusher gibunlot gikan sa balay, gipatay


PUSHER namatay human gipusil sa tulo ka mga tawo nga ningbunlot kaniya gikan sa sud sa ilang balay sa Purok Lumboy, Sityo Napo, Barangay Gundaruhan, lungsod sa Minglanilla, niadtong Sabado sa gabii, Mayo 22, 2020.

Si Philip Warren Abatayo, 31, minyo, ex-convict namatay sa samad pinusilan sa agtang.

Si Police Staff Sgt. Ernest Laspuña, sa Minglanilla Police Station nga nahinabi sa Superbalita Cebu, nibutyag nga natulog na si Abatayo niadtong higayuna dihang naabot ang tulo ka mga killer nga naka-bonnet.

Ningsud kini sa ilang balay, gibunlot ug giguroy pagawas agi sa kusina, dayon usa sa mga killer nipusil sa iyang agtang hinungdan sa iyang kamatayon.

Paspas nga mibiya ang mga killer sakay sa usa ka motorsiklo. Matod ni Laspuña nga drugas ang motibo sa krimen nga ilang gisubay.

Ilang nahibaw-an nga si Abatayo nadakpan niadtong Septiyembre 30,2018 tungod sa illegal nga drugas.

Siya nakagawas pagka Marso 2020 pinaagi sa plea bargaining. Sa plea bargaining, moangkon ang usa ka piniriso sa krimen alang sa mas gaan nga silot. (GPL)


Source: Sun.Star Superbalita (https://www.sunstar.com.ph/article/1857733/Superbalita-Cebu/Balita/Pusher-gibunlot-gikan-sa-balay-gipatay?ref=rss&format=simple&link=link)

No comments