Recent Posts

Breaking News

Piyesta sa Mandaue mingaw, misa gipaagi sa Facebook live


SA UNANG higayon, virtual o gipaagi sa Facebook live ang misa sa ika-382 nga piyesta sa National Shrine of Saint Joseph sa dakbayan sa Mandaue, Biyernes, May 8.

Si Cebu Auxillary Bishop Midyphil Billones maoy nangulo sa pontifical mass.

Sa iyang ebanghelyo ni Billones nga sama sa giatubang nga krisis sa kalibutan karon, nakaagi sab og krisis ang patron nga si Senyor San Jose.

Adunay tulo ka krisis nga gihisgotan si Billones sa iyang ebanghelyo sama sa iyang relasyon ngadto kang Maria, pagpangita og lugar kaanakan ug ang pagbyahe nila ngadto sa Ehipto aron tungod sa hulga sa kinabuhi sa batang Hesus.

"Happy Fiesta we mean be assured of God's help through St. Joseph and by following his example, healing comes to our community," matod ni Billones.

Nahinabi sa Superbalita Cebu si Mandaue City Mayor Jonas Cortes, ug sigon niya nga mao kini ang unang higayon nga mingaw ang pista sa dakbayan gani ang misa gisaulog lang pinaagi sa Facebook live.

Tungod sab nakanselar ang mga aktibidades nga kasagarang ipahigayon matag pista, sigon ni Cortes nga ang budget nga gi-alokar alang sa maong mga aktibidades gi-realign kini alang sa pagsugpo sa coronavirus disease (Covid-19).

Bisan paman nga sirado ang simbahan alang sa publiko apan abli gihapon ang dagkotanan hinungdan nga ang mga deboto miduaw aron mudagkot.

Sama ni Revive Ouano, 46, taga Barangay Guizo, Mandaue City, kinsa mihapit og panagkot human kini nagmerkado.

Lakip sa iyang giampo mao nga makapangita na og vaccine ang mga eksperto batok sa Covid-19 aron mabalik na sa normal ang tanan.

Si Letecia Del Castillo, 50, taga Barangay Centro, Mandaue City, nanimpad nga makasimba sa sulod sa simbahan ug tungod gisirado ang mga purtahan naglingkod nalang siya sa gawas samtang nagtan-aw sa Facebook live sa pontifical mass.

Sigon niya nga kada pista musimba gyud sila sa iyang pamilya ug musubay sa procession og karon tungod sa bag-ong mga paagi sa simbahan tungod sa hulga sa Covid-19 igo nalang siya nga nitan-aw sa Fb live.

Lakip sa mga giingon sa mga debotante nga nahinabi sa Superbalita nga sa mga miaging pista daghan gyung mga tawo nga magsuroy suroy sa kadalanan og adunay stage sa atubangan sa City hall dili sama karon nga mga ambulansya og fire trucks ang anaa sa maong dapit. (KFD)


Source: Sun.Star Superbalita (https://www.sunstar.com.ph/article/1855661/Superbalita-Cebu/Balita/Piyesta-sa-Mandaue-mingaw-misa-gipaagi-sa-Facebook-live?ref=rss&format=simple&link=link)

No comments