Recent Posts

Breaking News

Patay na, naa gihapon sa listahan sa benepisyaryo


MAGSAYSAY, Davao del Sur -- Hapsay ug malinawon ang paghatag og mga relief goods alang sa katawhan nga apektado sa general community quarantine (GCQ) bisan og aduna'y ngalan sa mga minatay nga naapil sa listahan, niadtong Huwebes, Mayo 7.

Lima ka mga barangay ang unang nahatdan sa tabang gikan sa Republic of Korea nga mga bugas ug aduna'y tag usa ka dressed chicken nga gidugang ang lokal nga gobyerno pinaagi sa Bayanihan Heal as One Act.

Ang mga Barangay Bacungan, New Ilocos, Glamang, Dalumay ug Malawanit maoy unang naka-benepisyo sa programa.

Apan sa Barangay New Ilocos, na-delatar kadali ang pagpang-apud-apod sa tabang human natawag og apil ang ngalan sa mga namatay na nga anaa gihapon sa listahan sa mga benepisyaryo.

Gumikan niini, daling gipasusi ni Barangay Kapitan Genaro Dumayas Jr. ang maong listahan mao nga nailisan na ang ngalan sa minatay og laing benepisyaryo nga wala pa sa listahan.

Sa Barangay Bacungan, gipadayag ni Mayor Arthur Davin nga anaa kanunay ang lokal nga gobyerno nga nag-suporta kanila panahon sa suliran sa coronavirus disease (Covid-19).

Gitubag sab sa mayor ang reklamo sa ubang senior citizens nganong di sila pagawson ug gipasabot nga gikinahanglan silang motuman sanglit sila ang dali ra mataptan sa mga sakit.

Matod ni Davin nga sukad pa niadtong panahon sa linog, wa na'y puas ang pagtabang sa lokal nga gobyerno inabagan sa ubang mga ahensya sa kagamhanan ug mga pribadong sektor human ubay-ubay ang nawad-an og kapuy-an.

"Mao nga ning higayona dapat motuman ta sa mandu nga magpuyo sa panimalay para di matakdan sa Covid-19," asoy ni Davin.

Sumala sa mayor nga wa nila gipili ang mga tawong gihatagan og tabang sanglit gikinahanglang ihiklin ang politika sa panahon nga ang tanang katawhan nagkinahanglan og kaabag.

Gipahibawo sab sa mayor nga gisugdan na nila ang istriktong pagpatuman sa balaod nga tag usa lang gyud kabuok ang mo-angkas sa motor ug usa lang sa pamilya ang moadto sa merkado.

Sa kasamtangan, pulos zero ang gisuspetsahan, probable ug confirmed nga kaso sa Covid-19 sa lugar apan wa sila'y kompiyansa mao nga kinahanglang ipailawom sa 14-day quarantine ang mga residenteng nipauli gikan sa laing lugar.

Aduna'y 19 ka mga indibidwal nga gipailawom sa kwarentinas, 736 ang cleared na, 15 ang wala sa lungsod ug siyam ang anaa sa border quarantine center.


Source: Sun.Star Superbalita (https://www.sunstar.com.ph/article/1855611/Superbalita-Davao/Balita/Patay-na-naa-gihapon-sa-listahan-sa-benepisyaryo?ref=rss&format=simple&link=link)

No comments