Recent Posts

Breaking News

Patay na, gidabdaban pa


COTABATO CITY -- Namakwit ang mga molupyo sa usa ka lugar sa probinsiya sa Maguindanao human nag-engkuwentro ang duha ka grupo sa Moro Islamic Liberation Front (MILF) alas 10:00 sa buntag, Martes, Mayo 5.

Napatay sa among engkuwentro si Kusain Dalimbang, nagpuyo sa Barangay Tukanalipao, Mamasapano.

Sumala kang Mamasapano Information Officer Maceda Abdillah nga nagka-engkuwentro ang grupo nila Kumander Salik Tekok ug Kumander Ustadz Gani Guiaman nga pulos mga sakop sa 118th Base Command (BC) sa MILF didto sa Barangay Tukanalipao.

Gumikan sa grabeng binakbakay, nanghikling ang mga sibilyan paingon sa luwas nga dapit sa kahadlok nga maipit sa kagubot.

Nasayran nga ang patay nga lawas ni Dalimbang kinsa sakop ni Kumander Salik Tekok, gibuboan og gasolina sa grupo ni Kumander Ustadz Gani Guiaman ug gidauban.

Giingon nga ang duha ka grupo sa MILF dunay personal nga dumot sa ilang matag pamilya hinungdan sa panag-engkuwentro.

Miapela si Abdillah sa kagamhanang probinsiyal sa Maguindanao ug sa Bangsamoro Autonomous Region in Muslim Mindanao (Barmm) nga moaksiyon dayon aron nga mahunong na ang panagbangi sa duha ka grupo.

Sa pagsuwat ning balita, nasayran nga padayon pa ang katag-katag nga mga pinusilay sa duruha ka grupo sa maong barangay. (Edgar E. Fuerzas)


Source: Sun.Star Superbalita (https://www.sunstar.com.ph/article/1855335/Superbalita-Davao/Balita/Patay-na-gidabdaban-pa?ref=rss&format=simple&link=link)

No comments