Recent Posts

Breaking News

P300,000 reward sa makatudlo sa pagpatay sa ex-journalist


COTABATO CITY -- Sobrang kasuko karon ang gibati ni Cotabato City Mayor Cynthia Guiani Sayadi sa pagpatay sa iyang secretary kinsa gipusil alas 7:30 sa buntag Mayo 25, sa siyudad.

Giila ang biktima nga si Anecito "Boy" Rasalan, kanhi brodkaster sa dxMY ug karon secretary ni Mayor Guiani-Sayadi.

Kahinumdoman nga samtang nagkaon ang biktima sa Sehua Eatery sa Notre Dame Avenue sa Barangay Rosary Heights 2, Cotabato City, kalit lamang kining giduol sa usa ka wala mailhing tawo ug gipusil gamit ang kalibre .45 nga pistola.

Abtik sab nga miikyas ang suspetsado ug misakay sa motorsiklo sa kauban niini nga naghulat daplin sa kalsada.

Gisapupo si Rasalan sa mga sibilyan ug mga nag-responde nga pulis diin siya gidala sa Cotabato Regional and Medical Center (CRMC) apan gideklara kini sa mga doktor nga dead on arrival.

Naka-angkon og upat ka samad pinusilan sa iyang lawas ang biktima nga maoy hinungdan sa kamatayon niini.

Si Rasalan una nga gibanhigan sa duha ka tawo nga nagmotor niadtong 2015 apan bisan samaron nakapadagan pa kini sa iyang sakyanan paingon sa balay-tambalanan.

Mismong si Mayor Guiani-Sayadi ang nagsulti nga dunay na siya'y mga tawo nga gidudahan nga maoy mipatay sa iyang sekretaryo.

Nagpagawas si Sayadi og P300 mil isip ganti sa mga tawo nga makatudlo sa mipusil-patay kang Rasalan ug mga utok niini.

Sa kasamtangan, ang kapulisan sa siyudad sa Cotabato nga gipangulohan ni Colonel Richard Fiesta ang padayon nga nag-imbestiga sa pagpamusil-patay sa biktima. (Edgar Fuerzas)


Source: Sun.Star Superbalita (https://www.sunstar.com.ph/article/1857826/Superbalita-Davao/Balita/P300000-reward-sa-makatudlo-sa-pagpatay-sa-ex-journalist?ref=rss&format=simple&link=link)

No comments