Recent Posts

Breaking News

Opisyal nga mipahimus sa SAP di pasayluon ni Cortes


DI PALABYON ug di pasayluon ni Mandaue City Mayor Jonas Cortes ang mga opisyal nga iyang masakpang ningmaniobra sa mga lista sa mga beneficiary sa Social Amelioration Program (SAP).

Ni-post si Cortes sa iyang Facebook page human makadawat og daghang mga reklamo kabahin sa mga naapil sa lista nga di kwalipikado o mga paryente sa mga opisyal sa barangay.

Adunay lima ka lakang nga buhaton ang Siyudad, matod ni Cortes.

Una, ang Department of Social Welfare and Development (DSWD) representative nga ni-validate sa lista sa kada barangay adunay gahom sa pagtangtang sa mga di angay nga makadawat.

Ikaduha, gimandoan ang Social Welfare Office nga i-turnover ang masterlist sa validated beneficiaries ngadto sa Criminal Investigation and Detection Group (CIDG), aron pasakaan og kaso ang illegal nga nakadawat og kwarta gikan sa SAP.

Ikatulo, ipauli ang tibuok kantidad sa SAP sa di kwalipikado ngadto sa Mandaue CIty Treasurer's Office.

Ikaupat, adunay gihimo nga baranagy grievance machinery nga moatiman sa mga sumbong ug reklamo mahitungod sa SAP atol sa pagpang-distribute niini ug hantod tulo ka-adlaw human sa petsa sa pay-out.

Ikalima, gisaad ni Cortes nga ang masakpan nga di angay makadawat di na i-apil sa sunod nga hugna sa distribution ug i-drop sa masterlist.

Dugang ni Cortes nga daan na niyang gipahibawo ang mga opisyal sa barangay nga way paryentehay, way amigihay sa paglista sa SAP.

Matod ni Cortes nga walay pasayluon kon adunay masakpan nga namintaha ug abuso karong panahon sa krisis.

Nahuman na

Nahuman na og apod apod sa SAP fund ang Mandaue City Treasurer's Office (CTO) ngadto sa beneficiaies gikan sa 27 ka mga barangay sa dakbayan sa Mandaue niadtong May 8.

Sa 35,000 ka beneficiaries nga gihatag sa DSWD, 96 posyento lang o 33,600 ka beneficiaries ang nakadawat.

Ang wala mahatagan kadtong mga nahibaw-an nga di kwalipikado, nagdoble ang ngalan, boluntaryong wala nidawat sa SAP, giprotestaan sa silingan, patay na, na-stuck sa probinsya, napriso ug ang uban gikan sa mga sitio sa baranagy nga na-lockdown.

Gani mi-request ang DSWD ngadto ni Cortes nga pun-an og 1,700 ka beneficiaries ang makadawat sa SAP tungod sa adunay sobra sa SAP funds.

Sigon ni Atty. Regal Oliva, city treasurer, nga aduna nay gihatag nga bag-ong lista ug gi-evaluate na sa DSWD.

Lakip sab ni sa nahuman na og apod-apod. (KFD)


Source: Sun.Star Superbalita (https://www.sunstar.com.ph/article/1855753/Superbalita-Cebu/Balita/Opisyal-nga-mipahimus-sa-SAP-di-pasayluon-ni-Cortes?ref=rss&format=simple&link=link)

No comments