Recent Posts

Breaking News

Nag-birthday naghatag og pagkaon sa frontliners


BANSALAN, Davao del Sur -- Usa ka ginang nga negusyante ang nagsaulog sa iyang adlaw'ng natawhan pinaagi sa pagpanghatag og pagkaon sa mga frontliners didto sa Inter-agency Task Force on Coronavirus Disease 2019 (Covid-19) sa Barangay Kinuskusan adlaw'ng Martes.

Gihangop sa 2nd Davao del Sur Provincial Mobile Force Company (DSPMFC) ang gihimo ni Rudycita Collados, gumikan inay nga maghikay alang sa iyang kaugalingon ug pamilya, apan nahuna-hunaan niini nga saulogon ang espesyal nga adlaw pinaagi sa paghatag og pagkaon sa mga frontliners sa lugar.

Mapasalamaton sab si Major Rey Santillan, 2nd DSPMFC officer-in-charge, tungod sa gihimong lakang sa ginang sanglit nagpakita kini nga aduna gihapo'y mga tawong mihatag og bili sa kahago luyo sa kainit sa panahon ug gipangbuhat sa mga frontliners nga anaa sa delikado nga sitwasyon nga hayan mataptan sa makamatay nga virus.

Walay labutangan sa pagpaabot sa dakong pasalamat sa ginang ngadto sa mga frontliners nga nag-sakripisyo aron maluwas ang tagsa-tagsa gikan sa kagaw.

Padayong gihangyo sa IATF-Covid-19 ang publiko nga motuman sa mga polisiya bisan gipailawom na sa general community quarantine ang probinsya apan gikinahanglan gihapon ang dobleng pag-igmat sa matag usa.

Gidason ni Santillan nga angayang seryosuhon sa komunidad ang pag-amping batok sa Covid-19 mao nga angayang magpuyo sa balay ang mga wala nanarbaho aron malikay sa maong sakit. (Orlando B. Dinoy)


Source: Sun.Star Superbalita (https://www.sunstar.com.ph/article/1857073/Superbalita-Davao/Balita/Nag-birthday-naghatag-og-pagkaon-sa-frontliners?ref=rss&format=simple&link=link)

No comments